Policia Kufitare në Dhërmi ka shpëtuar pesë persona, të cilët rrezikuan të mbyteshin në det pasi gomonia me të cilën po lundronin pësoi avari.
Sipas njoftimit të policisë, mjeti lundrues, i cili po lëvizte në drejtim të Porto Palermos, pësoi defekt në det. Pas marrjes së njoftimit, shërbimet e Policisë Kufitare u nisën menjëherë drejt vendit të ngjarjes.
Ndërsa në bord ndodheshin drejtuesi i gomones dhe katër persona të tjerë. Efektivët ndërhynë për t’u dhënë ndihmën e nevojshme dhe i shoqëruan me mjetin lundrues të Policisë Kufitare deri në breg, në Porto Palermo.
Fatmirësisht, të pesë personat u nxorën në breg në gjendje të mirë shëndetësore dhe nuk pati të lënduar.
Njoftimi i Policisë:
Dhërmi/Rrezikuan të mbyteshin në det pasi mjeti i tyre lundrues pësoi avari, Policia Kufitare shpëton 5 shtetas.
Menjëherë pas marrjes së njoftimit se një mjet lundrues gomone që po lëvizte në drejtim të Porto Palermos, kishte pësuar avari, shërbimet e Policisë Kufitare u nisën menjëherë drejt vendit të sinjalizuar.
Pas lokalizimit të mjetit lundrues, shërbimet e Policisë ndërhynë për t’i dhënë ndihmë drejtuesit të gomones dhe 4 shtetasve që ndodheshin në bord, të cilët i shoqëruan me mjetin lundrues të Policisë Kufitare, deri në breg, në Porto Palermo.
5 shtetasit ndodhen në gjendje të mirë shëndetësore dhe falënderuan punonjësit e Policisë Kufitare, për ndërhyrjen në kohë dhe ndihmën e dhënë.
Policia Kufitare apelon për të gjithë drejtuesit e mjeteve lundruese që të tregojnë kujdes të shtuar, të marrin në konsideratë kushtet atmosferike dhe të shmangin daljen në det kur ato paraqesin rrezik për sigurinë e tyre.
