“Në Austri vraponin për preshin shqiptar”/ Presidenti Meta rrëfen takimin me kamionistin që theu murin e ambasadës gjermane – Stop
Të Gjitha

“Në Austri vraponin për preshin shqiptar”/ Presidenti Meta rrëfen takimin me kamionistin që theu murin e ambasadës gjermane

Pas rreth 30 vitesh nga shembja e diktaturës, për Presidentin e Republikës, Ilir Meta, aspiratat e popullit shqiptar për një Shqipëri si gjithë Evropa nuk janë përmbushur ende.

Gjatë pjesëmarrjes në ceremoninë e hapjes së edicionit të 6-të “Ditët e Kujtesës”, kreu i Shtetit, risolli në vëmendje historinë e të riut Ylli Bodinakut që hyri me kamion në ambasadën gjermane bashkë me foshnjën 3 muashje, që solli edhe nisjen e shembjes së regjimit dhe takimin me të pas tri dekadash.

“Më kujtuat një histori shumë interesante, që ka të bëjë me një person që nuk njihet shumë, por të gjithë e dinë që në 2 korrik një qytetar i Tiranës, Ylli Bodinaku, mori kamionin e tij foshnjën 3 muajsh, ca shokë e miq që ishin kundër sistemit dhe hyri brenda ambasadës gjermane duke i rënë me kamion murit, duke u bërë pararendës i rrëzimit të murit të ambasadave në Tiranë dhe ardhjes së demokracisë.

 

Këtë e takova para disa javësh rastësisht, nuk e dija që atëherë kishte marrë edhe foshnjën 3 muajsh, që tani është 30 vjeç. I them mirë vetë, po për foshnjën, si e mendove? Po mirë unë, tha, por si mund të rritej fëmija im në atë regjim. Më tregoi një histori me Austrinë kur ishte në burg.

Na mbledhin një ditë tha në Spaç, dhe ngaqë na bënin presh tërë kohën dhe ishte momenti të bojkotonim ushqimin se nuk shtyhej dhe vjen një nga drejtuesit nga ministria e Brendshme dhe mbledh të burgosurit dhe thotë; para pak kohësh isha në Austri për vizitë dhe dolën me ambasadorin në Vjenë shëtitje dhe kur dolëm shohim gjitha ata njerëz po vraponin, ndonjë grevë?

Kur, pyeti ambasadori i thonë; kanë vrapuar austriakët se kishin ardhur maunet me presh nga Shqipëria dhe ngaqë e duan shumë dhe ka kërkesa për preshin e Shqipërisë, vrap i madh. Ndërsa, ju i thotë, këtu, nuk e kuptoni këtë të mirë që ju ofrojmë dhe ju japim cdo ditë.

Si mundet të jetojë fëmija ime në atë regjim, më tha. E them këtë sepse diktaturat janë regjime që bazohen mbi gënjeshtrat për të manipuluar shoqërinë duke i servirur gënjeshtrën si të vërtetë, ndërsa te pjesa tjetër përmes represionit” tha Meta

 

Previous ArticleNext Article

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *