Ujësjellësit po mbajnë në punë individë, të cilët marrin paga dhe shpërblime të panevojshme. Për këtë arsye, kuvendi i kërkon Entit Rregullator të Ujit të shkurtojë numrin e punonjësve në shoqëritë që kanë krijuar borxhe.
Punësimet nepotike dhe fryrja e borderove në ndërmarrjet e ujësjellës-kanalizimeve duhet të marrin fund. Kjo problematike është hasur në vite në këto ndërrmarrje, dhe ka ndikuar në rritjen e kostove dhe borxheve, e megjithatë nuk është zgjidhur në shumë prej bashkive të vendit.
Ndërmarrjet e ujësjellës-kanalizimeve janë ndër më problematiket sa i takon bilanceve të tyre ku shumica rezultojnë të jenë me humbje. Vlerësohet se vetëm faturat e papaguara për energjinë elektrike të tyre arrijnë 190 mln euro sot.
Për këtë arsye, qeveria nisi një reformë për bashkimin rajonal të tyre, duke synuar reduktim të shpenzimeve dhe performancë më të mirë në sektor.
