Gjeografia nga vijnë turistët e huaj është zgjeruar gjatë këtij viti. Nga të dhënat e ministrisë së Turizmit rezulton se shtetasit nga Azia që kanë vizituar Shqipërinë kanë pësuar rritjen më të madhe gjatë 7 muajve të 2024 krahasuar një vit më parë.

Në këtë mënyrë turistët nga Kina dhe India rezultojnë se kanë pësuar më shumë se dyfishim të numrit nëse i krahasojmë me të njëjtën periudhë të një viti më parë. Në këtë fluks të turistëve aziatike në vendin tonë ka ndikuar edhe fakti që Shqipëria ka hequr vizat për shtetasit kinezë dhe i ka lehtësuar ndjeshëm procedurat për ata indianë.

Interesant është edhe fakti që edhe shtetasit turq kanë preferuar që të vizitojnë më tepër Shqipërinë gjatë këtij viti. Në periudhën janar-korrik rezulton se në vendin tonë kanë hyrë 84% më tepër qytetarë nga Turqia e cila njihet për turizëm që ofron.

Shifrat konfirmojnë se Shqipërinë e kanë vizituar më tepër italianë e anglezë. Numri i shtetasve që kanë hyrë nga këto dy vende ka pësuar një rritje me mbi 50% nëse e krahasojmë me të njëjtën periudhë të një viti më parë. Pushuesit që vijnë nga Kosova edhe për këtë vit qëndrojnë në vend të parë me rreth 2.4 milionë duke pësuar një rritje me 22% krahasuar me një vit më parë.

Të dhënat tregojnë se vijojnë me rritje tregjet e konsoliduara të turistëve nga Maqedonia e Veriut, Mali i Zi, Italia e Polonia, ndërsa rritet atraktiviteti i Shqipërisë edhe për shtete ende jo aq të zakonshme deri pak vite më parë si Spanja, Franca, Holanda apo vendet nordike. Në total në 7 muaj në Shqipëri erdhën 6,3 milionë vizitorë të huaj. Përtej numrit të turistëve shifrat zyrtare konfirmojnë se të huajt kanë qëndruar më gjatë në Shqipëri. Sipas Instat numri i netëqëndrimeve është rritur me 27%.