Ministria e Infrastrukturës ka shpallur si fitues të tenderit për ndërtimin e tunelit të Llogarasë, një bashkim kompanish të cilët kanë ofruar rreth 12 milion dollarë më shumë se oferta më e mirë.
Sipas dokumenteve që Neës24 disponon tenderi kishte njëfond limit prej 18,9 miliard lekë. Nga pesë pjesëmarrës, fitues u shpall bashkimi i operatorëve ekonomikë INTEKAR YAPI dhe ASL që kërkoi ta ndërtojë tunelin për rreth 17 miliard lekë ose 170 milion dollarë. Tre ofertues të tjerë kërkuan më shumë para, por ndërkohë një tjetër bashkim operatorësh, përbërë kompania egjiptiane Concord Engineering dhe dy kompani shqiptare po, Alb Building dhe Alb Star, ka ofruar 12 milion dollarë më pak për të njëjtën punë, në total rreth 15,8 miliardë lekë ose 158 milion dollarë. Por edhe pse sipas ligjeve shqiptare oferta më e mirë financiare në prokurimet publike ka përparësi, sidomos kur bëhet fjalë për ndërtim rrugësh, ministria e Infrastrukturës ka gjetur justifikime për ta rrëzuar propozimin 12 milion dollarë më pak.
Sipas saj një prej kompanive shqiptare në ofertën më të mirë nuk ka përvojën e duhur për ndërtim urash 120 metra në një JointVenture, edhe pse ajo njihet si zbatuese e mjaft projekteve të akseve të rendesishme në vend. Po ashtu ministria e Infrastrukturës ka hyrë në kalkulime, dhe ka dalë në rezultatin se përqindjet në bashkim nuk korrepospondojnë me përqindjet në volumin e punimeve që duhet të rehalizohen nga secili operator.
Kaq ka mjaftuar që të shpallet si fituese një ofertë më e shtrenjtë, në vend që të futej në bisedime me ofertuesin më të mirë, për të zgjidhur këto çështje nëse ekzistojnë gjithmonë. Ministria e Infrastrukturës që në fakt është dhe përgjegjëse edhe për energjetikën ka preferuar që mos të kursejë para nga fondet e projekteve të veta për zbutjen e krizës, por t’i shpenzojë pa kriter, ndërkohë që financat e vendit po rëndohen me 200 milion euro.
Kujtojmë se shpallja fituese e kompanisë që ofroi 12 mln $ më shumë se oferta më e mirë, ndodhi në kohën që kryeministri Edi Rama paralajmëroi krizën në fushën e energjetikës.
Ndërkohë të shtunën kreu i qeverisë njoftoi paketën me tre pika të qeverisë për të mbrojtur konsumatorët shqiptarë. Një nga pikat që Rama prezantoi ishte mbulimi me plot 200 milion euro, garanci financiare për arkat e OSHEE.
