E Diel, 22 Nëntor 2026
Lajm i fundit
Durrësi harron tërmetin, KLSH: Bashkia nuk zbatoi qindra vendime për prishjen e ndërtimeve të paligjshme “Liria e fjalës nuk është pronë e profileve anonime”, Kumbaro reagon pas sulmeve online ndaj të rinjve pjesë e takimit me Kryeministrin Raporti, gjysma e familjeve shqiptare nuk përballojnë një shpenzim të papritur prej 1,000 eurosh pa borxh Rama: S’mendoj se duhet të zgjedh, ose mik me Mickoskin, ose me shqiptarët A është i vërtetë apo i rremë i famshmi Këmbëmadhi? Administrata Trump publikon përgjigjet Xhensila Myrtezaj përfundon në gjyq për evazion fiskal, dyshohet se fshehu mbi 60 milionë lekë të ardhura “Është në lojë jeta ime”, Veliaj: Nuk refuzoj operacionin, por dua të zgjedh vetë mjekun dhe spitalin Spiropali: Nuk pendohem, nuk gjunjëzohem dhe nuk pres mëshirë Trump për sulmin kibernetik ndaj FBI-së: Nuk më pëlqen, por ndoshta do të mësojmë gjëra që nuk i dinim Rama për Ditën e Alfabetit: Nën hijeshinë e këtyre gërmave jeton kujtesa dhe frymon e ardhmja e kombit
Bota

Premtimi i bujshëm në Vjenë/ Kandidati austriak për president: Përkrenaren dhe shpatën e Skënderbeut do t’i kthej në Krujë

Përpara përkrenares dhe shpatës së Skënderbeut në Vjenë, aktivisti austriak Günther Fehlinger-Jahn bën një premtim për shqiptarët: nëse bëhet president i Austrisë, do t’i kthejë ato në Krujë.

Ai është kandidat i vetëshpallur në zgjedhjet presidenciale të vitit 2028 dhe zotimin e ka publikuar në një video në rrjetet sociale.

“Si president i Austrisë, zotohem të kthej përkrenaren dhe shpatën e Skënderbeut në Krujë, Shqipëri, për të nderuar mbretin Skënderbe. Zotohem. O Zot, më ndihmo ta përmbush këtë zotim ndaj Skënderbeut, Austrisë dhe Shqipërisë”, shprehet ai.

Fehlinger-Jahn drejton Komitetin Austriak për Zgjerimin e NATO-s dhe është angazhuar prej vitesh për anëtarësimin e vendit të tij në aleancë. Me profesion konsulent biznesi, ai ka punuar në Bruksel dhe në Kosovë, ndërsa në vitin 2022 ndërmori një fushatë për mbledhjen e firmave kundër neutralitetit austriak dhe në mbështetje të hyrjes në NATO. Ai kërkon gjithashtu integrimin euroatlantik të Kosovës, Bosnjë-Hercegovinës dhe Ukrainës.

Si përfunduan në Vjenë përkrenarja dhe shpata e Skënderbeut?

Pas vdekjes së Skënderbeut në vitin 1468, bashkëshortja Donika dhe djali Gjoni u vendosën në Itali. Ata morën me vete edhe përkrenaren dhe shpatën e tij. Por se ku u ruajtën dhe në duart e kujt kaluan gjatë dekadave që pasuan, nuk është dokumentuar plotësisht.

Gjurmët e tyre shfaqen më shumë se një shekull më vonë në letrat e shkëmbyera me Ferdinandin II, arkidukë i Austrisë dhe sundimtar i Tirolit. Ai ishte pjesëtar i familjes Habsburge dhe koleksiononte armë e armatura të sundimtarëve dhe komandantëve të njohur, të cilat i ruante në kështjellën Ambras, pranë Innsbruckut.

Sipas të dhënave të përcjella nga Leo Alexander Freundlich, konsull i Shqipërisë në Austri gjatë mbretërimit të Zogut, një fisnik italian, Mario Sforza, i premtonte Ferdinandit se do t’i dërgonte armët e Skënderbeut. Në maj të vitit 1579, arkiduka e falënderonte për to.

Në inventarin e kështjellës Ambras të vitit 1593, përkrenarja dhe dy shpata renditen nën emrin e Skënderbeut. Në Vjenë u dërguan në vitin 1806, kur koleksioni u evakuua gjatë luftërave napoleonike. Aty ruhen edhe sot: përkrenarja dhe shpata ekspozohen në kompleksin Neue Burg, si pjesë e koleksionit të Muzeut të Historisë së Artit.

Në nëntor 2012, ato u sollën përkohësisht në Tiranë për 100-vjetorin e Pavarësisë, duke iu dhënë shqiptarëve një mundësi të pashoqe për t’i parë nga afër. Për disa javë, ato u ekspozuan në Muzeun Historik Kombëtar, përpara se të ktheheshin në Austri.

Denonco te STOP

Keni një shqetësim që duhet ta dijë opinioni publik?

Na kontaktoni me telefon ose WhatsApp. Ekipi i STOP verifikon çdo sinjalizim dhe del në terren.

↑