Mbi 160 persona kanë humbur jetën dhe qindra të tjerë janë plagosur pas dy tërmeteve të fuqishme që goditën Venezuelën të mërkurën në mbrëmje, duke shkaktuar dëme të mëdha dhe panik në disa rajone të vendit.
Dy lëkundjet sizmike, me magnitudë 7.2 dhe 7.5, u regjistruan me vetëm pak sekonda diferencë rreth orës 18:00 sipas kohës lokale. Kryeqyteti Karakas ishte ndër zonat më të prekura, ku ndërtesa të shumta u dëmtuan ose u shembën.
Mes të mbijetuarve është edhe Verónica, një banore e Karakasit, e cila tha se mendoi se nuk do t’i shpëtonte katastrofës. Ajo po festonte një festë kombëtare së bashku me nënën e saj kur tërmetet goditën qytetin.
“Mendova se do të vdisja,” tha ajo.
Ajo rrëfen se u shtuan edhe orë të tëra pasigurie për familjet që nuk arrinin të kontaktonin të afërmit e tyre.
Valentina, e shqetësuar për fatin e motrës dhe nënës së saj, nisi të kërkonte ndihmë nga miqtë dhe të njohurit për të mësuar nëse ato kishin mbijetuar. Ajo shprehet se në telefonin e saj filluan të mbërrinin pamje të ndërtesave të shembura në zonën ku banonin.
Pas përpjekjeve të shumta, ajo më në fund arriti të lidhej me Verónicën të motrën, e cila konfirmoi se ajo dhe nëna e saj kishin shpëtuar pa lëndime. Megjithatë, dëmet materiale rezultuan shkatërruese.
Ekipet e shpëtimit vazhdojnë kërkimet në rrënojat e ndërtesave të shembura, ndërsa në disa pamje të publikuara dëgjohen persona të bllokuar që kërkojnë ndihmë. Autoritetet kanë paralajmëruar se numri i viktimave mund të rritet, pasi ende nuk është bërë një vlerësim i plotë i dëmeve në disa nga zonat më të goditura.
Rrugët e Karakasit janë mbuluar nga mbeturinat, ndërsa ndërprerjet e energjisë elektrike dhe të internetit po vështirësojnë operacionet e emergjencës. Mijëra banorë kanë mbetur pa strehim dhe po presin informacione për fatin e shtëpive dhe të afërmve të tyre.
Autoritetet dhe ekipet e emergjencës vijojnë përpjekjet për gjetjen e të mbijetuarve dhe ofrimin e ndihmës për komunitetet e prekura nga një prej fatkeqësive natyrore më të rënda që ka goditur vendin në vitet e fundit.
