Kuvendi i Shqipërisë ka miratuar me 84 vota pro ndryshimet në ligjin për Bankën e Shqipërisë, të cilat parashikojnë mbrojtje të posaçme për guvernatorin, duke kufizuar mundësinë e marrjes së masave ndaj tij pa autorizimin e Kuvendit.

Sipas ndryshimeve të miratuara në seancën plenare të kësaj të enjteje, ndaj guvernatorit nuk mund të vendoset masë arresti dhe nuk mund të kryhen kontrolle në banesë apo kontrolle vetjake pa autorizimin e Kuvendit.

Për miratimin e këtij ligji kërkohej shumicë e cilësuar votash. Në votim morën pjesë 84 deputetë, nga të cilët 81 ishin të Partisë Socialiste dhe 3 të Partisë Socialdemokrate (PSD).

Nga radhët e Partisë Socialiste mungoi vetëm deputeti Ceno Klosi.

Miratimi i ndryshimeve me shumicë të cilësuar i hap rrugë zbatimit të dispozitave të reja, që përcaktojnë garancitë ligjore për guvernatorin e Bankës së Shqipërisë.