Këshilli rajonal i Malopolskas në Poloni ka votuar për të mbetur një “zonë pa LGBT”, pavarësisht paralajmërimeve të Bashkimit Evropian se mund të humbasë fondet.

Autoritete të shumta lokale në Poloni e kanë refuzuar të ashtuquajturën “ideologji LGBT” pasi të drejtat e homoseksualëve janë bërë një çështje e profilit të lartë dhe thellësisht përçarës në vendin katolik nën sundimin nacionalist konservator.

Kjo e ka vendosur Poloninë në një kurs përplasjeje me Komisionin Evropian, i cili thotë se zonat mund të shkelin ligjin e BE-së kur bëhet fjalë për mosdiskriminimin në bazë të orientimit seksual.

Rajoni jugor Malopolska tha se kishte marrë një letër paralajmëruese, në të cilën thuhet se mund të humbë më shumë se 2.5 miliardë euro nga fondet e BE-së nëse nuk tërheq deri në mes të shtatorit deklaratën e bërë në vitin 2019.

“Ne nuk mundemi thjesht ta mohojmë atë që u tha në vitin 2019,” citon Euronews udhëheqësin e këshillit Jan Duda, i cili është babai i Presidentit të Polonisë Andrzej Duda.

“Ne duhet të takohemi dhe të rishkruajmë këtë deklaratë, pasi ajo e vitit 2019 është keqkuptuar.”

Disa konservatorë fetarë në Poloni thonë se nuk kanë asgjë kundër komunitetit homoseksual, por ata kundërshtojnë atë që ata e quajnë “ideologji LGBT”, e cila sipas tyre kërcënon vlerat e krishtera.

“Zonat pa LGBT” kërkojnë të ndalojnë promovimin e homoseksualitetit dhe identiteteve të tjera seksuale të pakicave, veçanërisht në shkolla.

“Edhe një herë, urrejtja dhe zemërimi i PiS [partia politike e krahut të djathtë kombëtar-konservator në Poloni] doli të ishte më e rëndësishme sesa e mira e qytetarëve dhe ata do të vuajnë më shumë nga ky vendim,” tha Robert Biedron, një anëtar i krahut të majtë të Parlamentit Evropian dhe politikani i profilit të lartë polak që ka dalë hapur si homoseksual. Qeveria e Polonisë mohon të ketë ligje që diskriminojnë njerëzit bazuar në orientimin e tyre seksual.