Një kapitull i ri në përfaqësimin diplomatik të Bashkimit Evropian në Shqipëri nis këtë të mërkurë. Sofia Moreira de Sousa zyrtarizon marrjen e detyrës si ambasadore e BE-së në Tiranë, pas përfundimit të mandatit të diplomatit italian Silvio Gonzato.

Hapi i parë institucional i diplomates portugeze do të jetë në Presidencën e Republikës, ku ajo do t’i dorëzojë kredencialet Presidentit Bajram Begaj. Ceremonia do të formalizojë nisjen e mandatit të saj në Shqipëri.

Moreira de Sousa vjen në këtë post me një karrierë të konsoliduar në diplomacinë evropiane. Përpara se të emërohej në Tiranë, ajo ka drejtuar Përfaqësinë e Komisionit Evropian në Portugali, ndërsa në një fazë të mëparshme të karrierës ka përfaqësuar Bashkimin Evropian si ambasadore në Kepin e Gjelbër.

Emërimi i saj vjen në një periudhë kur marrëdhëniet Shqipëri-BE dhe procesi i integrimit evropian mbeten ndër çështjet kryesore të agjendës politike dhe diplomatike të vendit.