Një rast dhune në familje është regjistruar pasditen e kësaj të shtune në Pogradec. Bashkëshorti ka dhunuar rëndë gruan e tij 73-vjeçare.

Ngjarja ka ndodhur vetëm pak minuta më parë në qytetin liqenor, ku pas një debati që kanë patur mes njëri-tjetrit, bashkëshorti mësohet se ka dhunuar me sende të forta bashkëshorten e tij të moshuar, duke i shkaktuar plagë të shumta në trup.

Policia ka reaguar duke bërë të mundur ndalimin e agresorit ndërkohë që 73-vjeçarja pasi është dërguar në spitalin e Pogradecit mësohet se është bërë gati për tu dërguar me helikopter drejt Spitalit të Traumës pasi gjendja e saj paraqitet shumë e rëndë.

Ky është rasti i dytë brenda pak ditësh në Pogradec i dhunës në familje, ku vetëm pak ditë më parë bashkëshorti goditi me thikë bashkëshorten duke i shkaktuar plagë të rënda ndërsa ditën e sotme një i moshuar bën për spital bashkëshorten e tij.

“Pogradec / Informacion paraprak. Rreth orës 16:10, në lagjen nr. 1, Pogradec, shtetasi M. Sh., 78 vjeç, dyshohet se, gjatë një konflikti në banesë, ka goditur në kokë, me një shkop druri, bashkëshorten e tij, shtetasen Sh. Sh., 69 vjeçe, e cila është dërguar në spital për ndihmë mjekësore, në gjendje të rëndë.

78-vjeçari është shoqëruar në Komisariatin e Policisë Pogradec dhe po kryhen veprimet procedurale. Grupi hetimor, nën drejtimin e Prokurorisë, po vijon punën për zbardhjen e plotë të rrethanave të ngjarjes’, njoftoi policia.