Bledi Çuçi mori dje zyrtarisht detyrën e re si ministër i Brendshëm.

Teksa la ministrinë e Bujqësisë, Çuçi fillimisht u betua përpara presidentit, Ilir Meta së bashku me pasardhësen e tij, Milva Ekonomi.

Pasi dorëzoi çelësat e ministrisë së Bujqësisë përmes një ceremonie që zgjati për gati dy orë, Bledi Çuçi u prit në ministrinë e Brendshme nga paraardhësi i tij, Sandër Lleshaj.

Ceremonia e dorëzimit të detyrës u zhvillua edhe në praninë e kreut të qeverisë, Edi Rama, i cili i dha “bekimin” në detyrën e re ministrit Çuçi.

 “Ministri i Brendshëm të konsolidojë atë profil që Sandri (Lleshaj) filloi të ndërtonte si një figurë drejtuese, e punëve të brendshme, jo si polici numër 1 i Shqipërisë”, u shpreh Rama.

I tillë duket se është edhe zotimi i Çuçit, i cili e merr këtë post të rëndësishëm kaq befasisht. Ai dëshiron që mandati i tij, për aq sa të zgjasë të mbahet mend si ministër i punëve të Brendshme.

“Në përfundim të mandatit do të doja që publiku të thoshte i mbaroi mandati ministrit të Brendshëm, dhe jo ministrit të policisë apo të rendit”, u shpreh Çuçi.

“Ndihem mirë që sulmet që u shkaktuan kundër shtetit, t’i përballojmë pa shkaktuar ndonjë tragjedi të pariparueshme”, ishin fjalët e fundit të Sandër Lleshajt nga zyra që e drejtoi për afro dy vjet.