Në ditëlindjen e Skënderbeut, kreu i PD-së Sali Berisha e përkujtoi Heroin Kombëtar në një aktivitet në Krujë, duke thënë se me të “lindi shteti i shqiptarëve”.
Berisha vlerësoi figurën e Skënderbeut dhe kontributin e tij në mbrojtjen e Shqipërisë dhe Evropës, duke e cilësuar si një nga figurat më legjendare të historisë.
“Skënderbeu ishte dhe është habia e shekujve, se si një njeri me pak njerëz, pa mbështetje, i qëndroi perandorisë më të madhe të kohërave. I qëndroi dhe e mundi në 25 beteja. Skënderbeu është legjendar në mbrojtjen që i bëri Evropës. Pa luftërat e tij, osmanët do të kishin hyrë me kohë në zemër të Evropës. Figura e Skënderbeut meriton mijëra nderime, meriton çdo vepër dhe çdo respekt. Ndaj dhe për ne, sot këtu kremtojmë pavdekësinë e tij. Skënderbeu për 25 vite zhvilloi 25 beteja dhe, si askush tjetër, i fitoi ato. Betejat e tij janë një kryevepër e artit ushtarak, që edhe sot studiohen në akademitë ushtarake më serioze të botës”, tha Berisha.
Më tej, Berisha u ndal edhe te situata aktuale politike në vend, duke e krahasuar në mënyrë figurative qeverisjen e sotme me një “pushtim”, që sipas tij ka sjellë largimin masiv të shqiptarëve nga vendi.
Ai akuzoi kryeministrin Edi Rama, duke e cilësuar si përgjegjës për emigracionin dhe për pengimin e integrimit europian të vendit, ndërsa përdori edhe krahasime të forta politike.
Berisha vijoi më tej me tone të ashpra ndaj qeverisë, duke e quajtur Ramën me terma figurativë dhe duke e akuzuar për vjedhje dhe keqqeverisje.
“Një pushtim tjetër, ndër më të egrit që ka njohur historia, detyroi si kurrë më parë 47 përqind të shqiptarëve të largohen në 10 vite nga Shqipëria. Dhe ky nuk është një sulltan osman, jo, ky është një argat i Beogradit, për shqiptarët më i zi shumë herë se Gjeorgjeviçi, më i zi se Vuçiçi, më i zi se Çubrilloviçi. Sepse me qëndrimet e tij ndaj shqiptarëve, ky ka tejkaluar Vuçiçin”, tha Berisha.
Në fund, Berisha u bëri thirrje mbështetësve të vijojnë betejën politike “deri në çlirimin e Shqipërisë”, duke e lidhur frymëzimin me figurën e Skënderbeut.
“Të frymëzuar nga prijësi ynë i përjetshëm, të vazhdojmë këtë betejë deri në çlirimin e plotë, deri në shpëtimin e plotë të Shqipërisë, deri sa t’i bëjmë qytetarët shqiptarë të lirë, ashtu si prijësi i tyre i përjetshëm, Skënderbeu”, përmbylli Berisha.
