Produktet e prekura nga tërheqja nga tregu janë “Squeezy Dumplings” nga GIHNJSI dhe “Rainbow Mystery Squishy Buns” nga OKK Trading. Të dyja lodrat përmbajnë rruaza uji, të cilat nëse gëlltiten nga fëmijët mund të zgjerohen në stomak, duke shkaktuar mbytje, bllokim të zorrëve, shqetësime të rënda shëndetësore dhe, në raste ekstreme, edhe rrezik për jetën, ka paralajmëruar CPSC.
Sipas njoftimit zyrtar, tërheqja nga tregu përfshin rreth 8,000 lodra “Squeezy Dumplings”, të shitura në Amazon gjatë muajve maj dhe qershor. Lodrat kanë një formë të rrumbullakët dhe të butë, përmbajnë grimca që ngjajnë me xixa dhe kanë fytyra vizatimore. Ato shiten në një paketim që imiton një enë bambuje për gatim me avull, ku shkruhet “SQUEEZY DUMPLINGS” dhe “SQUEEZE ME” (“MË SHTRËNGO”).
Në të njëjtën tërheqje përfshihen edhe më shumë se 7,200 lodra “Rainbow Mystery Squishy Bun”, të cilat janë shitur në dyqane të palëve të treta në të gjithë SHBA-në nga maji deri në gusht të këtij viti.
Edhe këto lodra kanë një pamje të ngjashme me “Squeezy Dumplings”: janë të buta, kanë xixa dhe fytyra vizatimore dhe shiten në të njëjtin lloj paketimi në formë ene avulloreje. Në etiketë shkruhet “Rainbow MYSTERY” dhe “SUGAR EDITION”.
CPSC ka paralajmëruar gjithashtu konsumatorët që të mos përdorin dhe t’i hedhin lodrat “Squishy Bun Toys” të prodhuara nga Ivyapingdianpu, pasi edhe ato përmbajnë rruaza uji që nuk përmbushin standardet e detyrueshme të sigurisë.
Sipas CPSC, kompania ka marrë një Njoftim për Shkelje, por nuk ka pranuar të bëjë tërheqjen e produkteve nga tregu dhe as të ofrojë rimbursim për konsumatorët. Lodrat në formë dumpling-u përmbajnë gjithashtu grimca të ngjashme me xixa, kanë fytyra vizatimore dhe shiten në një avullore të rreme me etiketat “SQUISHY BUN” dhe “Rainbow MYSTERY”.
Bëhet fjalë për rreth 100 lodra të tilla, të cilat janë shitur në Amazon gjatë muajit qershor, si dhe përmes shitësve të tjerë. Në rast se një konsumator pëson dëmtim apo konstaton ndonjë problem me lodrën, CPSC i kërkon që ta raportojë produktin pranë agjencisë.
Paralajmërimet e fundit vijnë pas një sërë rastesh ku konsumatorët kanë pësuar djegie nga shpërthimi i lodrave “squishy”. Disa prej incidenteve kanë ndodhur pasi lodrat janë futur në mikrovalë në kuadër të një sfide në TikTok, ndërsa në raste të tjera ato janë lënë thjesht në ambiente me temperatura të larta ose në diell.
Gjatë verës, një adoleshente nga West Virginia përfundoi në spital pasi u dogj nga një lodër “squishy”, e ngjashme me “mystery dumplings” që u bënë virale apo kubet “NeeDoh”. Lodrën e kishte harruar aksidentalisht brenda një makine të nxehtë.
Automjeti funksionoi pa dashje si një lloj furre diellore. Temperatura e lartë bëri që lodra të nxehej, të dobësohej dhe të zgjerohej. Kur adoleshentja hipi në sediljen e pasme, flluska e mbushur me xhel shpërtheu dhe i spërkati këmbët me silikon të shkrirë.
