Italia mund të ndalojë së shpejti përdorimin e mishit të kalit sipas një ligji që do t’i përcaktonte kuajt, gomerët dhe mushkat si kafshë shtëpiake, duke e bërë vrasjen e tyre të paligjshme, raportoi sot gazeta Guardian.
Projektligji u hartua nga një politikane nga partia Noi Moderati, anëtare e koalicionit qeverisës, Michela Vitoria Brambila, dhe mbështetet gjithashtu nga partitë opozitare.
Nëse miratohet, do të parashikojë dënime me burg deri në tre vjet dhe gjoba deri në 100,000 euro për therjen e këtyre kafshëve.
Mishi i kalit është një pjesë tradicionale e kuzhinës italiane, veçanërisht në Puglia, Kampania, Sicili, Lombardi, Veneto dhe Emilia-Romagna.
Edhe pse konsumi ka rënë ndjeshëm në dhjetë vitet e fundit, Italia mbetet një nga importuesit dhe konsumatorët më të mëdhenj të këtij mishi në Evropë.
Projektligji propozon gjithashtu vendosjen e detyrueshme të mikroçipit dhe një sistem kombëtar gjurmimi, së bashku me një fond prej 6 milionë eurosh për të ndihmuar mbarështuesit të përshtasin operacionet e tyre.
“Jemi në shekullin e 21-të dhe kuajt ende shfrytëzohen në mënyra të ndryshme”, tha Brambila, e cila është gjithashtu presidente e Shoqatës për të Drejtat e Kafshëve në Leiden.
Ajo shtoi se projektligji është “një mundësi e jashtëzakonshme për të sjellë një ndryshim kulturor që është tashmë i dashur për zemrat e shumicës së italianëve”.
Ish-Ministri i Bujqësisë dhe politikan nga Liga e ekstremit të djathtë, Gian Marco Centinaio, një anëtar i koalicionit qeverisës, tha megjithatë se ndalimi i konsumit të mishit të kalit “do të thoshte fshirja e një pjese të historisë së kuzhinës italiane”, e cila u regjistrua në listën e trashëgimisë kulturore jomateriale të organizatës UNESCO në dhjetor, “dhe gjithashtu identitetin e disa rajoneve”.
