Një 64-vjeçar në Shkodër është dhunuar me sende të forta nga dy persona, pas një konflikti në lidhje me vendosjen e shezlongëve në një hapësirë në plazhin e Velipojës.

Policia ka shpallur në kërkim dy shtetasit 27-vjeçar me iniciale S. M dhe Z. M, të cilët dhunuan të moshuarin dhe i dëmtuan automjetin me të cilin lëvizte.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

“Specialistët për Hetimin e Krimeve të Komisariatit të Policisë Shkodër referuan materialet në Prokurori, ku nisi procedimi në gjendje të lirë për shtetasin D. T., 31 vjeç, si dhe shpallën në kërkim shtetasit Z. M., 27 vjeç dhe S. M., 27 vjeç, të tre banues në Shkodër, pasi dyshohet se në bashkëpunim me njëri-tjetrin, kanë kanosur shtetasin S. H., 64 vjeç, banues në Shkodër, e kanë goditur atë me mjete të forta dhe i kanë dëmtuar automjetin me të cilin lëvizte, për shkak të shfrytëzimit të hapësirave në plazh, për vendosjen e shezlongëve. Vijon puna për kapjen e shtetasve Z. M dhe S. M”, njofton policia.