Dy persona janë vënë në pranga në Durrës pasi janë kapur me lëndë narkotike në makinë.

Policia bën me dije se në kuadër të operacionit të koduar “Nënkalimi”, u arrestuan në flagrancë shtetasit Arian Plaku, Edmond Gjyzeli. Gjatë aksionit u sekuestrua 1.6 kilogramë kokainë dhe një armë zjarri.

Arrestimi i tyre u bë bazuar në informacionet e siguruara në rrugë operative për implikimin në veprimtarinë kriminale të shitjes së lëndëve narkotike në Durrës.

Fillimisht, shërbimet e Policisë, rreth orës 14:15, në vendin e quajtur “Nënkalimi i Urës së Dajlanit”, kanë ndaluar mjetin tip “BMW”, me drejtues shtetasin Edmond Gjyzeli dhe pasagjer shtetasin Arian Plaku.

Gjatë kontrollit në mjet, në pjesën e poshtme të sediljes, shërbimet e Policisë gjetën dhe sekuestruan në cilësinë e provës materiale 1 kg e 63 gr lëndë narkotike kokainë. Në momentin e ndalimit, gjatë kontrollit fizik, shtetasit Edmond Gjyzeli iu gjet në brez një armë zjarri pistoletë me 14 fishkë.

Ky shtetas, gjatë ndalimit të mjetit nga forcat e Policisë, ka goditur automjetin e agjentëve të Forcës së Posaçme Operacionale me automjetin e tij dhe gjatë arrestimit, ka tentuar të nxjerrë nga brezi armën e zjarrit. 37-vjeçari u neutralizua menjëherë dhe iu sekuestrua arma e zjarrit tip pistoletë.

Materialet i kaluan Prokurorisë së Rrethit Gjyqësor Durrës, për veprat penale “Prodhimi dhe shitja e narkotikëve” dhe “Armëmbajtja pa leje.