Policia e Elbasanit ka vënë në pranga dy persona në lidhje me shpërthimin në një apartament në qytetin e Elbasanit.

Burime nga policia bëjnë të ditur se është arrestuar në tentativë për t’u larguar drejt Greqisë pronari i apartamentit ku ndodhi shpërthimi, Arbër Pepa.

Ai dyshohet nga hetuesit se inskenoi shpërthimin me tritol në apartamentin e tij në qytetin e Elbasanit.

Përveç pronarit të apartamentit, policia ka arrestuar edhe nipin e tij, pasi dyshon se të dy kanë organizuar vendosjen dhe më pas shpërthimin e eksplozivit në banesën e Pepës.

Nga burime policore thuhet se ka dyshime se vendosja e lëndës plasëse është bërë me qëllim që ngjarja të përdorej si arsye për të përfituar azil në vendet e BE-së.

Arbër Pepa, i cili banonte në apartamentin ku ndodhi shpërthimi gjatë mbrëmjes së të mërkurës në Elbasan, u arrestua teksa tentoi të kalonte kufirin drejt Greqisë, së bashku me gruan dhe fëmijën ndërsa nipi i tij u kap në qytetin e Elbasanit.