Pas deklaratës publike të Këshillit të Lartë Gjyqësor, Kryeministri Edi Rama ka reaguar në lidhje me qëndrimin e tij të mëparshëm për disa vendime gjyqësore që ai i cilëson si “skandaloze e brutale” dhe në “dëm të interesit publik”.
Në një postim në rrjetet sociale, Kryeministri thekson se e ka lexuar me vëmendje reagimin e KLGJ, duke theksuar se ky institucion “ka harruar se roli i saj themelor është të shqetësohet për cilësinë e drejtësisë dhe të garantojë publikun se vendimet që merren nga gjykatësit në dëm të tij nuk kalojnë pa u analizuar”.
“Gjykatësit nuk janë maliqër që bëjnë ç’të duan me ligjin në emër të pavarësisë.”-tha Rama.
Ai kritikon qasjen e KLGJ-së, duke argumentuar se ky organ ka detyrimin të marrë seriozisht shqetësimet e palëve të prekura nga vendimet gjyqësore, veçanërisht kur këto vendime, sipas tij, “janë të ububushme për nga mungesa e ndjeshmërisë ndaj interesit publik”.
Megjithatë, Kryeministri shpreh dakordësinë me një pjesë të deklaratës së KLGJ, ku theksohet se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”.
“E kam informuar publikun se do të ndjekim këtë rrugë ligjore, duke iu drejtuar KLGJ-së dhe Inspektorit të Lartë të Drejtësisë.”-vijon Rama.
Në përfundim të reagimit të tij, Rama i bën thirrje anëtarëve të KLGJ të përqendrohen në misionin e tyre dhe jo në mënyrën si ai ushtron detyrën e Kryeministrit:
“Mos harxhoni kohën për të gjykuar se si e bëj unë punën për të cilën më ka votuar populli shqipta përqendrohuni tek puna juaj, që gjermësot lë shumë për të dëshiruar në funksion të Shqipërisë 2030 në BE.”
Reagimi i plotë i Kryeministrit:
Lexova reagimin e KLGJ, organi më i lartë i vetëqeverisjes së gjyqësorit, lidhur me çka unë kam ndarë me publikun për disa vendime skandalozisht brutale në mbrojtje të zaptuesve të hapësirës publike dhe në dëm të rendit ligjor, interesit publik si edhe komuniteteve të cënuara drejtëpërdrejt nga këto vendime. KLGJ i ka rënë shumë gjatë, duke harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë. KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cënuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik. KLGJ ka harruar edhe të tjera gjëra më shumë rëndësi, por të paktën ka thënë një të vërtetë që më gjen shumë dakord, duke nënvizuar se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”. Duke e mbyllur me kaq për sot, u them anëtarëve të KLGJ të mos harxhojnë kohën e tyre për të gjykuar se si e bëj unë punën për të cilën më ka votuar populli shqiptar – gjykatësi im i përditshëm të cilit unë nuk kam se si të mos ia shpjegoj hapur pse nuk largohen njësoj si të tjerat ca ngrehina të paligjshme në mes të rrugës, që marrin mbrojtjen e pajustifikueshme të ca gjykatësve të pandjeshëm ndaj interesit publik – po të përqëndrohet tek puna e vet, që gjermësot le shumë për të dëshiruar në funksion të Shqipërisë 2030 në BE.
