Një pendë e zogut Huia të Zelandës së Re tashmë të zhdukur ka vendosur një rekord botëror pasi u shit për 28,417 dollarë në një ankand.
Penda, që fillimisht pritej të kapte vlerën deri në 3,000 dollarë, theu rekordin e mëparshëm që ishte vendosur për një pendë të së njëjtës specie me 450%, tha Shtëpia e Ankandeve Webb.
Zogu huia ishte i shenjtë për popullin Maori. Puplat e tyre shpesh mbaheshin si koka nga krerët dhe familjet e tyre dhe gjithashtu dhuroheshin ose tregtoheshin.
Për herë të fundit shpendi është parë në vitin 1907, por pamjet e pakonfirmuara u raportuan për 20 deri në 30 vjet pas kësaj, sipas Muzeut të Zelandës së Re.
Huia ishte një zog këngëtar i vogël në Zelandën e Re dhe ishte i njohur për aftësitë e tij të kërcimit dhe pendën e bukur, e cila dallohet për majën e bardhë përgjatë skajit. Penda e shitur të hënën ishte në gjendje të mrekullueshme, ka thënë Leah Morris, Shefja e Arteve Dekorative në Shtëpinë e Ankandeve Webb.
“Ajo ka ende shkëlqimin e saj shumë të dallueshëm dhe nuk ka pasur dëmtime nga insektet,” tha ajo për BBC.
Ajo shton se shtëpia e ankandeve e ka kornizuar artikullin pas xhamit mbrojtës UV dhe me letër arkivore, që të ketë një jetë shumë të gjatë.
Penda është e regjistruar si një taonga tuturu nën një sistem për të mbrojtur objektet e Maori. Vetëm koleksionistët që kishin licencë në sistem u lejuan ta blinin dhe nuk mund ta largojnë nga vendi pa leje nga Ministria e Kulturës dhe Trashëgimisë.
Në të kaluarën, pendët huia ishin një shenjë statusi për njerëzit Maori. Tashmë një zog i rrallë para ardhjes së evropianëve, specia u bë një objektiv për koleksionistët dhe tregtarët e modës pasi fitoi popullaritet në mesin e atyre që erdhën në Zelandën e Re, gjë që çoi në zhdukjen e tij, sipas Muzeut të Zelandës së Re.
