Pakistani përdori shiun artificial për herë të parë sot në një përpjekje për të frenuar nivelet e rrezikshme të ndotjes në qytetin e Lahore, tha qeveria provinciale.

Avionët e pajisur me pajisje për mbjelljen e reve fluturuan mbi qytet, i cili është ndër më të ndoturit në botë, raportoi Al Jazeera.

“Ka rënë shi në të paktën 10 zona të Lahore”, u tha gazetarëve ministri kujdestar i Punjabit, Mohsin Naqvi, duke shtuar se autoritetet po monitoronin ndikimin e shiut artificial në një rreze prej 15 kilometrash.

Cilësia e ajrit në Lahore, shtëpia e rreth 11 milionë njerëzve, ka qenë veçanërisht e dobët javët e fundit dhe qeveria e Punjabit ka zbatuar disa taktika, duke përfshirë mbylljen e hershme të bizneseve dhe mbylljen e shkollave për dy ditë shtesë për të ndihmuar në përmirësimin e cilësisë së ajrit, por asgjë nuk ndihmoi.

“Ekipet nga Emiratet e Bashkuara Arabe, së bashku me dy avionë, mbërritën këtu rreth 10 deri në 12 ditë më parë. Ata përdorën 48 pishtarë për të krijuar shi”, tha Naqvi.