Zv.kryeministrja Albana Koçiu ka zhvilluar një takim këtë të premte me banorët e pallatit 12-katësh që u përfshi nga flakët pak ditë më parë, ku apartamentet e tyre u shkatërruan nga zjarri masiv.

Gjatë takimit, Koçiu ka deklaruar se aktualisht nuk mund të jepen afate për përfundimin e punimeve, pasi hetimet për ngjarjen ende nuk janë mbyllur. Ajo theksoi se institucionet po punojnë për zgjidhjen sa më të shpejtë të situatës dhe se nuk ka pasur neglizhencë nga ana e tyre.

“Nuk jap dot afate për mbylljen e punimeve, pasi ende nuk është mbyllur hetimi. Askush nuk po neglizhon, po përpiqemi që gjëja të zgjidhet sa më shpejt. Duhet të kuptojmë shkakun nga se ka ardhur zjarri, se mund të ketë edhe përgjegjës”, është shprehur Koçiu.

Ndërkohë, drejtoresha e Agjencisë së Zhvillimit të Territorit, Adelajda Roka, ka bërë me dije se po punohet që brenda një muaji të sigurohet leja për nisjen e punimeve, ndërsa fillimisht duhet të përmbyllet inventarizimi i dëmeve.

“Do të vijë një grup arkitektësh, por më parë duhet të mbyllet inventari”, tha ajo.

Roka shtoi gjithashtu se pas një jave pritet të përcaktohen më qartë afatet për përfundimin e rindërtimit, pas vlerësimit në terren të situatës.

Ndërkohë, administratorja e kompleksit është shprehur se kompania është e gatshme të mbulojë dëmet dhe të marrë përgjegjësitë ligjore për rindërtimin.

“Ne jemi të gatshëm për të mbuluar dëmet, dhe për të rindërtuar”, tha ajo, duke shtuar se janë të gatshëm të formalizojnë marrëveshjet ligjore përmes noterit.

Për ngjarjen janë arrestuar katër persona, ndërsa pronari i kompanisë “Arlis”, Armand Lilo, është shpallur në kërkim. Gjithashtu, nën hetim ndodhen edhe dy punonjëse të marketit.