Kryetari i Bashkisë së Kuçovës, Kreshnik Hajdari rrezikon shkarkimin nga detyra pasi nuk ka deklaruar në Formularin e Dekriminalizimit një dënim ndaj tij në Greqi në vitin 1999.

Gazetarja e Klan News, Klesiana Omeri, raporton se ka mbërritur vendimi i gjykatës greke, ku evidentohet se Kreshnik Hajdari është dënuar në Janinë për kalim të paligjshëm të kufirit me 4 muaj burgim, dënim i cili u konvertua në atë kohë me gjobë 1500 Dhrahmi (monedha greke para Euros).

Vendimi i dënimit nga Gjykata e Janinës ishte kërkuar nga Prokuroria Shqiptare, përmes së cilës u provua se Hajdari rezulton i dënuar në shtetin grek.

Për këtë arsye, ditën e nesërme do të mblidhet Komisioni Qëndror i Zgjedhjeve dhe do të shqyrtojë nëse do t’i hiqet mandati ose jo kryebashkiakut të Kuçovës.

Vepra penale për të cilën është dënuar dhe konvertuar në gjobë, kalim i paligjshëm i kufirit, nuk hyn në ato vepra që i rëndon pozitën një funksionari të lartë, mirëpo Hajdari rrezikon shkarkimin për shkak se nuk e ka deklaruar këtë dënim, ashtu siç e parashikon ligji i Dekriminalizimit.