Pas thuajse dy muajsh, policia arreston Emiljano Ninën, shoferin e automjetit “BMVV X6”, që u përplas te Diga e Liqenit. Kushëriri i të shumëkërkuarit, të zhdukur Ervis Martinaj, u arrestua në banesën e tij në zonën e 5 majit në Tiranë.

28-vjeçari do të përballet me 7 akuza, dhe veç shkeljes së rregullave të qarkullimit rrugor do të përballet edhe me akuzën e shkatërrimit të pronës, për shkak të dëmeve te liqeni.

Automjeti luksoz, duke lëvizur me shpejtësi të lartë, nga “Rruga e Kosovarëve” hyri mes për mes një rruge automobilistike me trotuar, më pas është ngjiti skarpatën duke marrë para pemë e shtylla, për të përfunduar në pedonale mbi digën e liqenit, ku ndaloi, pa përfunduar në liqen.

Në polici, sipas asaj që mëson gazetari Besar Bajraktaraj, Nina ka deklaruar se kishte pirë tullumbace me azot dhe se po lëvizte me një shpejtësi prej 180 kilometrash në orë.

Për këtë aksident pas hekurave qëndron edhe 26-vjeçari Eldi Allushi. Ai u tha efektivëve të policisë se Emiljano Nina pas aksidentit shkoi në shtëpinë e tij dhe fjeti gjumë, por nuk i tregoi për përplasjen e ndodhur.

Policia sqaron se Emiljano Nina ka qenë në kërkim edhe për dhunë në familje dhe është dënuar 8 muaj për këtë vepër penale.