Kryetari i Partisë Demokratike, Lulzim Basha ka uruar të rinjtë në Ditën Kombëtare të Rinisë me thirrjen e tyre: “E duam Shqipërinë si gjithë Europa!”.

Basha shkruan se 30 vjet më parë heronjtë e rinisë shqiptare ndryshuan përgjithmonë fatin e Shqipërisë.

“E duam Shqipërinë si gjithë Europa!  Kjo ishte thirrja e tyre, teksa kapërcenin barrierat policore dhe dhunën e regjimit.

E duam Shqipërinë si gjithë Europa!  30 vjet më parë, heronjtë e rinisë shqiptare ndryshuan përgjithmonë fatin e Shqipërisë.

Ata luftuan për liri, për demokraci, për të drejtat e njeriut – dhe fituan.  Në 30 vjetorin e lëvizjes së dhjetorit le t’i nderojmë ata me zotimin për të bërë realitet Shqipërinë si gjithë Europa!”, shkruan kryedemokrati në një postim në Facebook.