Presidenti amerikan Donald Trump ka publikuar në platformën e tij Truth Social disa video të pazakonta, mes tyre edhe një të krijuar me inteligjencë artificiale, ku shfaqet duke ndjekur dhe duke u përleshur me një tigër, përpara se ta përqafojë atë.
Pamjet u publikuan të martën në mbrëmje, vetëm disa orë pasi Trump kishte shpërndarë një video reale të një sulmi fatal nga një tigër ndaj një burri që kishte hyrë në kafazin e kafshës në një park të jetës së egër në Angli.
Në videon e krijuar me IA, Trump shfaqet duke ndjekur dhe duke u përleshur me kafshën e egër. Në fund, të dy përqafohen nën tingujt e këngës së njohur “The Lion Sleeps Tonight”.
Presidenti amerikan publikoi gjithashtu një tjetër video, ku paraqitet si një luan që përballet me hienat. Në këtë rast, kundërshtarët e tij politikë, mes tyre Barack Obama, Nancy Pelosi dhe Gavin Newsom, paraqiten si kafshë që e sulmojnë dhe e tallin.
Publikimet erdhën pas ngjarjes tragjike të 10 tetorit në Parkun e Jetës së Egër të Yorkshire, pranë Doncaster, ku një burrë humbi jetën pasi hyri në hapësirën e rrethuar të tigrit.
Trump e shoqëroi videon e sulmit me mesazhin: “Mos u ngatërroni kurrë me natyrën! Presidenti DJT”.
Shpërndarja e pamjeve reale të sulmit shkaktoi shqetësim, pasi policia e South Yorkshire u kishte kërkuar qytetarëve të mos i shpërndanin videot që qarkullonin në internet, duke kërkuar respekt për viktimën dhe familjen e tij.
President Trump posts an AI video of himself playing with a tiger after posting footage of a man being fatally attacked by a tiger in the UK. https://t.co/UJpYMLqceb
— Akayla Gardner (@gardnerakayla) October 14, 2026
