Një rast tragjik është raportuar në redaksinë tonë, ku 70-vjeçarja Afërdita Krasta ka humbur banesën e saj, si pasojë e një zjarri të madh, ku ndërroi jetë edhe vëllai i saj. Prej rreth 40 ditësh, ajo jeton pa një cati mbi kokë, duke u strehuar herë pas here te fqinjët. Infermierja e lagjes, Mimoza Xhamaqi, tregon, se e moshuara ndodhet në gjendje të vështirë dhe pa mbështetje. Sipas saj, Afërdita nuk ka as kushtet minimale të jetesës dhe vuan edhe nga shumë sëmundje.Grupi ynë i xhirimit konstatuar, se banesa është e shkatërruar pothuajse plotësisht nga zjarri, ndërsa fqinjët e kanë ndihmuar duke i siguruar edhe lidhje elektrike dhe kushte minimale higjienike. Megjithatë, e moshuara refuzon të hyjë në shtëpi për shkak të traumës.Pas ndërhyrjes mediatike, rasti është referuar tek institucionet sociale, të cilat kanë bërë me dije se dokumentacioni është dërguar në strukturat e Emergjencave Civile për vlerësim të dëmit, ndërsa po pritet përfundimi i ekspertizës lidhur me viktimën. Ndërkohë është premtuar përfshirja e saj në skemën e ndihmës ekonomike dhe mbështetje psikologjike për të përballuar traumën.
Në Zall herr, Cekrezë, duket se është improvizuar një landfill i ri. Mbetjet aty janë bërë mal, ndërsa banorët e zonës, kanë kërkuar ndihmën e emisionit “Stop”, për të sensiblizuar për zgjidhjen e situatës.
Një studente e Fakultetit të Shkencave Mjekësore Teknike, e diplomuar për Teknikë Imazherie, ka konstatuar një gabim të rëndë në diplomën e saj. Data e diplomimit është shënuar gabim 2022 në vend të 2025. Kjo pasaktësi vë në pikëpyetje vlefshmërinë e dokumentit dhe rrezikon drejtpërdrejt procesin e licensimit profesional.Pasi ka kërkuar korrigjimin, fakulteti nuk ka lëshuar një diplomë të re, por vetëm një vërtetim shoqërues. Ndërkohë, pranë Urdhrit të Infermierit, specialistja e licensimit, Silvana Bejko, sqaron, se procedura bazohet mbi të dhënat e kartonit të diplomës, ç’ka do të thotë, se çdo gabim në të, duhet korrigjuar nga vetë institucioni arsimor.Në një komunikim me fakultetin, pranohet, se bëhet fjalë për një gabim njerëzor, por argumentohet, se diploma lëshohet vetëm një herë dhe nuk mund të ribëhet, sidomos nëse është firmosur dhe tërhequr nga studenti. Sipas tyre, zgjidhja është pajisja me një vërtetim që konfirmon të dhënat e sakta. Ekspertja e arsimit të lartë Nora Malaj thekson, se një vërtetim nuk mund të zëvendësojë një diplomë me të dhëna të pasakta. Sipas saj, zgjidhja ligjore është asgjësimi i diplomës me gabim dhe pajisja e studentes me një diplomë të re.
