Në zemër të Athinës antike, në rrugët e ngushta dhe përreth siteve arkeologjike, grupet e vizitorëve duken kudo, duke ndjekur njëri-tjetrin pas guiderëve turistikë.
Më parë, autoritetet do t’i kishin mirëpritur këto pamje. Por për Haris Doukas-in, kryebashkiakun socialist që synon të rikthejë qendrën e mbingarkuar të qytetit për qytetarët, fillimi i sezonit turistik e vë në rrezik “mbingopjen” e zemrës historike. Ai beson se lagje të tëra rrezikojnë të humbasin autenticitetin për shkak të zhvillimit të pakontrolluar turistik.
“Athina nuk mund të funksionojë sikur të ishte një hotel gjigant,” tha ai në një intervistë sipas The Guardian. “Duhen kufizime dhe rregulla. Qytetet duhet të kenë fjalën e tyre për mënyrën si zhvillohen.”
Vitin e kaluar, më shumë se 8 milionë persona vizituan Athinën, një rekord për një metropol që deri jo shumë kohë më parë konsiderohej vetëm një ndalesë drejt ishujve grekë.
Vetëm në qiratë afatshkurtra, qëndrimet gjatë natës në zonën e njohur si “Plaka”, poshtë Akropolit, janë më shumë sesa të dyfishuara që nga viti 2018.
Në bashkinë neoklasike të qytetit, zyrtarët thonë se koha është thelbësore nëse Athina nuk do të bjerë viktimë e suksesit të saj. Shenjat paralajmëruese janë kudo: nga rritja e fortë e qirave që ka nxjerrë jashtë tregut banorët vendas, deri te infrastruktura e mbingarkuar që po përkulet nga presioni.
“E gjithë Athina po hapet për të përballuar situatën,” tha Doukas, i cili më parë ka qenë profesor i energjisë dhe klimës përpara se të hynte në politikën vendore. “Po ndërtojmë infrastrukturë energjie, sisteme uji, kanalizime të reja, rrjete 5G. Kur ke rreth 700 mijë banorë dhe 8 milionë vizitorë, presioni është i jashtëzakonshëm.” Çdo muaj, shtohen “më shumë staf, më shumë pajisje, më shumë makineri” për të përballuar sfidat.
Doukas mori detyrën në vitin 2024 pasi fitoi papritur me mbështetjen e partisë kryesore opozitare Pasok, me premtimin për të “gjelbëruar” atë që konsiderohet kryeqyteti më i nxehtë i kontinentit. Nën drejtimin e tij janë mbjellë rreth 3 mijë e 855 pemë në territorin e bashkisë.
Por ndërsa tërheqja e Athinës është rritur, kryebashkiaku është përballur me forcat që ai i fajëson për “zhvillimin e pakontrolluar” në zonat turistike. Ai ka në shënjestër kompanitë e ndërtimit që kërkojnë të ndërtojnë godina shumëkatëshe pranë Akropolit, si dhe investitorët dhe sipërmarrësit e pasurive të paluajtshme. Po ashtu, ai synon të frenojë përhapjen e bareve dhe restoranteve në tarraca, shpesh pa licencë.
Përplasja u intensifikua këtë javë, kur Doukas tha se do të përdorë një projektligj për përdorimin e tokës në turizëm, aktualisht në diskutim, për të kërkuar ndalimin e plotë të aktiviteteve të reja të biznesit në qendrën historike të qytetit.
“Do të ndalojmë të gjitha investimet turistike në lagjen Plaka, të cilën dua ta shpëtoj. Nuk ka më hapësirë. As për qira afatshkurtra, as për apartamente shërbimi, as për hotele apo forma të tjera turizmi. Zona është e mbingopur,” tha ai. “Duam të themi ‘mjaft është mjaft’ me një ligj të mirëfilltë.” Sipas tij, investitorët duhet të orientohen drejt zonave më pak të mbingarkuara.
Kryebashkiaku ka propozuar gjithashtu ngrirjen e lejeve të ndërtimit për hotele të reja, duke ndjekur një masë të ngjashme të qeverisë që kufizon qiratë afatshkurtra në lagjet pranë Akropolit.
