Kryetari i Partisë Demokratike, Sali Berisha, ka folur këtë të mërkurë në një konferencë për mediat me gazetarët rreth aktualitetit politik. Berisha ka thënë se, sipas tij, Rama po nëpërkëmb Kushtetutën.
“Ky është shteti që ndërtoi Edi Rama. Kjo është drejtësia që ndërtoi Edi Rama. Unë i them këto fjalë me një keqardhje shumë të thellë, por nuk mund të mos i them para jush, qytetarë, kur shoh se si ju nëpërkëmbeni nga ata të cilët, për ju dhe në emër tuaj, duan të bëjnë drejtësinë, ligjin dhe Kushtetutën.
Ju garantoj se standard i tillë në botë nuk ekziston. Unë nuk them se Gjykata Kushtetuese nuk ka qenë pa të meta, por kurrë nuk ka qenë e tillë. Edhe atëherë kur ka dhënë 37 vendime kundër qeverisë time, nuk ka qenë e tillë.
Edhe atëherë kur në gjykatë ishin anëtarë të kryesisë së PS-së, nuk ka qenë e tillë. Sot ajo është në gjendjen më të turpshme, më të mjeruar, me njerëzit më pa dinjitet që mund të bëhen.
Unë mund t’i marr një nga një dhe të analizoj shkaqet konkrete të qëndrimeve të djeshme, por nuk do ta bëj, sepse më shumë se çdo shkak flet qëndrimi i tyre, flet paturpësia e tyre dhe zvarritja tre herë.
Njerëz më të turpshëm për një detyrë se ata nuk ka. Por ky është një fenomen. Të dashur qytetarë e qytetare, kjo është krijesa e narkoshtetit. Ju e patë se si, një javë më parë, qeveria e drejtësisë dhe kryeministri i drejtësisë shkelmuan mbi dokumente zyrtare, edhe të institucionit të tij, edhe të vendit fqinj, mbi ligjin dhe Kushtetutën, në një akt pafytyrësie ekstreme.
Po pse kështu? Sepse i tillë është kryeministri i vendit. Ndaj edhe ata sillen në këtë mënyrë ndaj jush, qytetarë.
Ata janë me shkollë, këta mender-gjykatës një pjesë e tyre, turp-gjykatës një pjesë e tyre. Këta janë me shkollë. Ose kanë fakultet juridik, ose kanë fakultete të tjera.
Pra, nuk janë njerëz të pashkolluar, por janë njerëz të zhveshur nga çdo moral njerëzor, nga çdo moral zyrtari.
Janë njerëz që shkelmojnë mbi ju si larva, qytetarë; janë njerëz që shkelmojnë mbi interesat tuaja. I them të gjitha këto me një qëllim: se ju jeni shpresa e fundit dhe e vetme e këtij vendi.
Shikoni se ku ka arritur. Ju jeni shpresa e fundit dhe e vetme e këtij vendi, prandaj të vazhdojmë me vendosmërinë më absolute gjer në triumfin e moralit, të drejtës, të legjitimitetit, të dinjitetit të qytetarëve, interesit të tyre dhe të Shqipërisë”, – tha Berisha.
