Mali i Zi po përballet prej më shumë se një muaji me një skandal që ka tronditur politikën dhe institucionet e vendit, pas publikimit në rrjetet sociale të videove dhe fotografive intime që përfshijnë zyrtarë të lartë shtetërorë. Në qendër të aferës janë Mirjana Pajković, ish-sekretare shtetërore në Ministrinë e të Drejtave të Njeriut dhe të Pakicave, dhe Dejan Vukšić, ish-drejtor i Agjencisë Kombëtare të Sigurisë (ANB) dhe ish-këshilltar i presidentit Jakov Milatović për sigurinë. Të dy dhanë dorëheqjen nga detyrat e tyre, duke përmendur “arsye personale”, menjëherë pas publikimit të materialeve intime.
Pajković ka paraqitur tre kallëzime penale, duke pretenduar se materialet janë shpërndarë pa pëlqimin e saj dhe duke akuzuar Vukšić për kërcënime dhe shantazh. Ajo ka publikuar edhe një audio-incizim, ku thuhet se dëgjohet zëri i Vukšić që thotë: “I gjithë Mali i Zi do t’i shohë” videot intime. Pajković ka deklaruar për mediat malazeze se materialet u përdorën për të ushtruar presion ndaj saj dhe për të dëmtuar karrierën e saj, duke theksuar mungesën e reagimit të autoriteteve shtetërore. Ajo ka denoncuar gjithashtu mungesën e barazisë gjinore në politikë dhe shkeljen e të drejtave dhe lirive të njeriut, duke vënë në dukje se gratë shpesh përballen me presion që të jenë “të padukshme” dhe pamja e tyre interpretohet padrejtësisht si mungesë serioziteti.
Nga ana tjetër, Vukšić mohon çdo përfshirje në publikimin e videove dhe pretendon se i ka parë ato vetëm pasi u shpërndanë ilegalisht online. Ai ka deklaruar se Pajković i kishte marrë telefonin celular në mënyrë të paligjshme në tetor 2024, duke shkaktuar keqpërdorimin e materialit dhe incizimin e audio-mesazheve. Vukšić ka bërë kallëzim penal kundër Pajković dhe personave të paidentifikuar, duke pretenduar se është shantazhuar më parë nga individë të panjohur që i kërkonin të tërhiqej nga kandidatura për gjyqtar në Gjykatën Kushtetuese, përndryshe audio-incizimi do të publikohej. Ai gjithashtu ka paralajmëruar padi ndaj personave që e kanë fyer dhe kërcënuar në rrjetet sociale dhe ndaj një deputeti që e ka quajtur publikisht “person të dhunshëm”.
Agjencia Kombëtare e Sigurisë (ANB) ka sqaruar se nuk ka lidhje me përmbajtjen e materialeve dhe se nuk merret me korrespondencë private. Sipas saj, materialet e publikuara nuk lidhen me aktivitetin zyrtar të agjencisë dhe nuk janë objekt interesi për institucionin.
Prokuroria e Podgoricës ka hapur dy hetime penale bazuar në kallëzimet e Pajković dhe hetimet janë ende në fazën paraprake. Autoritetet po analizojnë të gjitha rrethanat dhe përgjegjësitë e çdo personi të përfshirë, duke përfshirë edhe rolin e mundshëm të zyrtarëve të tjerë. Në këtë kontekst, përmendet edhe zyra e presidentit Milatović, pasi audio-incizimi kërcënues dyshohet se është bërë nga një telefon fiks në zyrën e presidentit, ku Vukšić ka punuar më herët si këshilltar, megjithëse presidenti nuk është objekt hetimi.
Ky skandal ka ndezur debat të gjerë mbi privatësinë, etikën e zyrtarëve publikë dhe mënyrën se si autoritetet trajtojnë çështjet që prekin të drejtat dhe liritë e qytetarëve në Mal të Zi. Rasti tregon gjithashtu tensionin mes presionit politik, shantazhit dhe mbrojtjes së të drejtave të grave në skenën publike.
