Ministrja për Punët e Jashtme dhe Evropën, Elisa Spiropali, dha sot një konferencë për mediat lidhur me ftesën që Presidenti i SHBA, Donald Trump, i ka dërguar Kryeministrit të Shqipërisë, Edi Rama, për t’u bërë pjesë e Bordit të Paqes.

Spiropali e konsideroi këtë ftesë si një vlerësim të lartë për rolin e Shqipërisë në paqe dhe stabilitet dhe kritikoi, sipas saj, disa interpretime të gabuara që janë shpërndarë lidhur me këtë ngjarje.

“Ftesa është një vlerësim i drejtpërdrejtë i Presidentit Trump për Kryeministrin Rama, i ftuar personalisht. Por, fatkeqësisht, edhe kjo është përballur me një sërë reagimesh mediatike. Edhe për një shtet të vogël si Shqipëria, ky lajm është pasuruar me shumë keqinterpretime në publik. Kur Shqipëria ftohet të bëhet pjesë e një mekanizmi të ri ndërkombëtar vendimmarrës me impakt global jo në Honolulu, por në Shtëpinë e Bardhë skena jonë politike shpesh paraqitet sikur Shqipëria është përjashtuar me turp, ndërkohë që është ftuar me nder. Ky është një mesazh i politikës së re nga Amerika e re. Në Tiranë shpërndahen gjithfarë tregimesh me miliarda dollarë që supozohet se do të paguhen për Bord dhe për palestinezët që do t’i sjellim në Shqipëri, sikur në Bordin të ulej një parti dhe jo Shqipëria. Nuk është i vërtetë.” – tha Spiropali.