Suchir Balaji, një ish-inxhinier i OpenAI, i cili ndihmoi në trajnimin e sistemeve të inteligjencës artificiale pas krijimit të ChatGPT dhe më vonë shprehu shqetësime lidhur me shkeljen e të drejtave të autorit nga praktikat e përdorura, ka ndërruar jetë në moshën 26-vjeçare. Vdekja e tij është konfirmuar nga prindërit dhe zyrtarët e San Franciskos.
Balaji punoi për gati katër vjet në OpenAI, ku kontribuoi në zhvillimin e disa projekteve të rëndësishme, përfshirë WebGPT, një nga hapat kryesorë që mundësoi krijimin e ChatGPT. Bashkëthemeluesi i OpenAI, John Schulman, e përshkroi atë si një nga kontribuesit më të rëndësishëm të kompanisë dhe lavdëroi aftësinë e tij për të zgjidhur probleme të ndërlikuara me zgjidhje të thjeshta dhe efektive.
Balaji u gjet i vdekur më 26 nëntor në apartamentin e tij në San Francisko. Policia e qytetit tha se 26-vjeçari kishte kryer vetëvrasje, ndërkohë që hetimet në lidhje me rastin vijojnë ende.
Prindërit e tij, Poornima Ramarao dhe Balaji Ramamurthy, e përshkruan djalin e tyre si një të ri tëë lumtur, të zgjuar dhe të dashur, dhe shprehen se janë ende në kërkim të përgjigjeve për vdekjen e tij. Balaji kishte studiuar shkenca kompjuterike në Universitetin e Kalifornisë, Berkeley, dhe fillimisht kishte nisur stazhin në OpenAI në vitin 2018.
Në vitet e tij të fundit në OpenAI, Balaji u përfshi në trajtimin e të dhënave që u përdorën për të zhvilluar GPT-4, dhe shprehu publikisht shqetësimet mbi shkeljet e mundshme të të drejtave të autorit nga përdorimi i të dhënave pa leje. Ai ishte kritik ndaj mënyrës se si teknologjitë e krijuara nga OpenAI po përhapeshin, duke përmendur mundësinë e përdorimit të informacionit të pasaktë nga modelet AI.
Balaji u largua nga OpenAI në gusht të vitit 2024, dhe vendosi të ndiqte një rrugë tjetër për të ndihmuar në zhvillimin e inteligjencës artificiale më të avancuar. Ai gjithashtu shprehu interes për të ndjekur një doktoraturë dhe për të eksploruar mundësi të tjera në fushën e inteligjencës artificiale.
