Drejtori i Drejtorisë së Rendit Publik në Shqipëri, Ylli Vasili, në një deklaratë për mediat ka bërë me dije se gjatë ditëve të fundit janë evidentuar 48 raste të vjedhjes së energjisë elektrike.
Në kuadër të këtij operacioni kanë rënë në prangat e policisë 12 shtetas, janë shpallur në kërkim 3 shtetas, janë proceduar penalisht 33 shtetas, si dhe 3 punonjës të OSHEE-së, për shpërdorim detyre.
Drejtori i Drejtorisë së Rendit Publik në Policinë e Shtetit, Ylli Vasili në një deklaratë për shtyp u shpreh se, “strukturat e Policisë së Shtetit vijojnë kontrollet në të gjithë vendin, në bashkëpunim me OSHEE-në, për evidentimin dhe goditjen e paligjshmërisë në fushën e vjedhjes së energjisë elektrike.
Gjatë ditëve të fundit, si rezultat i kontrolleve janë evidentuar 48 raste të vjedhjes së energjisë elektrike. Për këto raste, nga specialistët për Hetimin e Krimeve në Komisariatet e Policisë në qarqe janë arrestuar në flagrancë 12 shtetas, janë shpallur në kërkim 3 shtetas, janë proceduar penalisht 33 shtetas, si dhe 3 punonjës të OSHEE-së, për shpërdorim detyre”, tha Vasili.
“Në Elbasan janë arrestuar në flagrancë 2 shtetas dhe janë proceduar penalisht 2 të tjerë. Gjithashtu, po nga këto struktura janë proceduar penalisht për veprën penale “Shpërdorim detyre”, 3 punonjës të OSHEE-së, pasi nuk kanë raportuar për ndërhyrjet në aparatet matëse të energjisë elektrike”, u shpreh ai. “Në Tiranë janë arrestuar në flagrancë 6 shtetas, janë proceduar penalisht 2 shtetas dhe janë shpallur në kërkim 2 shtetas të tjerë. Gjithashtu janë kapur 3 shtetas të shpallur në kërkim më parë”, theksoi Vasili.
“Në Vlorë janë arrestuar në flagrancë 2 shtetas dhe është proceduar penalisht 1 shtetas tjetër. Në Lezhë është arrestuar në flagrancë 1 shtetas dhe janë proceduar penalisht 6 shtetas të tjerë. Në Berat është arrestuar në flagrancë 1 shtetas. Në Shkodër janë proceduar penalisht 16 shtetas. Në Gjirokastër janë proceduar penalisht 4 shtetas. Në Durrës është proceduar penalisht 1 shtetas dhe është shpallur në kërkim 1 shtetas tjetër. Në Dibër është proceduar penalisht 1 shtetas.
Si rezultat i këtyre kontrolleve, nga data 14 tetor deri më datë 8 nëntor 2021 janë evidentuar 237 raste të vjedhjes së energjisë në banesa dhe në disa subjekte të ndryshme. Për këto raste janë arrestuar në flagrancë 58 shtetas, janë proceduar penalisht 130 shtetas dhe janë shpallur në kërkim 34 shtetas të tjerë. Gjithashtu janë proceduar penalisht 4 punonjës të OSHEE-së, për “Shpërdorim detyre”, tha ai.
Vasili shtoi se, “shërbimet e Policisë janë duke ushtruar kontrolle të pandërprera në territor, jo vetëm për të evidentuar rastet e paligjshmërisë në fushën e vjedhjes së energjisë elektrike, por edhe për të parandaluar, evidentuar dhe goditur çdo paligjshmëri në cilëndo fushë që ajo shfaqet”.
Policia e Shtetit fton qytetarët që të denoncojnë në numrin 112 dhe në Komisariatin Digjital, çdo rast të paligjshmërisë, duke iu garantuar anonimat të sigurt, reagim të menjëhershëm, profesional e të paanshëm.
