Gjykata e Posaçme e Apelit ka shtyrë për në 24 shtator seancën për Fatmir Mediun.

Paraditen e sotme ishte parashikuar të shqyrtohej kërkesa e SPAK për rigjykimin e Mediut në cilësinë e ish-ministrit të Mbrojtjes për çështjen ‘Gërdeci’.

Në vendimin e Apelit thuhet se seanca u shty për të vijuar më datë 24 shtator për shkak se njëra prej palëve, konkretisht Fatmir Mediu nuk ka marrë dijeni rregullisht.

Dy muaj më parë shkalla e parë rrëzoi kërkesën e Prokurorisë së Posaçme me argumentin se kanë kaluar të gjitha afatet ligjore për rigjykim të çështjes. Në Apel dosja do të shqyrtohet nga gjyqtarja Saida Dollani.

Dy muaj më parë Gjykata e Posaçme kundër Krimit të Organizuar dhe Korrupsionit rrëzoi kërkesën e SPAK për të rigjykuar ish-ministrin me argumentin se nuk ka prova të reja dhe se mungesa e imunitetit që nga 2012 për deputetët nuk e ka penguar prokurorinë të hetojë në këta 10 vjet.

Rihetimi i Fatmir Mediut u kërkua nga SPAK, pasi e akuzon si një nga ish-zyrtarët përgjegjës për tragjedinë e Gërdecit.