Mësimi online/ Besa Shahini :“Do të vazhdojmë të xhirojmë dhe transmetojmë leksione të arsimit parauniversitar në RTSH” – Stop
Të Gjitha

Mësimi online/ Besa Shahini :“Do të vazhdojmë të xhirojmë dhe transmetojmë leksione të arsimit parauniversitar në RTSH”

“Do të vazhdojmë të xhirojmë dhe transmetojmë leksione të arsimit parauniversitar në RTSH, si dhe mësuesit përmes platformave të ndryshme po rrinë në kontakt me nxënësit e tyre dhe po zhvillojnë për aq sa është e mundur mësimin në kushte shtëpie”, fillon mesazhin e saj në komunikimin e radhës Ministrja Besa Shahini ndërsa u jep përgjigje në vijim edhe disa prej pyetjeve të ardhura.

Pyetje e ngritur shpesh nga prindërit është se “pse nuk po unifikohen platformat që po përdorin mësuesit për të komunikuar me nxënësit e tyre?”. Në lidhje me këtë çështje, Ministrja Shahini përgjigjet:

“Kjo është një ide e mirë dhe po e shqyrtojmë mënyrën më të mirë që ta zbatojmë në nivel shkolle. Pra, t’i nxisim drejtorët e shkollave që të punojnë me të gjithë mësuesit dhe t’i orientojnë ata drejt një platforme të vetme, në mënyrë që një nxënës në klasë të shtatë, i cili punon me disa mësues të lëndëve të ndryshme, mos të ketë nevojë të kalojë nga një platformë tek tjetra, por të punojë me një platformë të vetme”, sqaron ajo duke theksuar se kjo nuk nënkupton që do të përjashtohet puna përmes rrjeteve sociale:

“Kjo nuk do të thotë që do të përjashtojmë punën përmes rrjeteve sociale. Whatsapp-i është një platformë, e cila përdoret nga të gjithë mësuesit. Platformat e tjera si Google Classroom psh. përdoret nga një pjesë e mësuesve dhe nxënësve apo prindërit e tyre. Pra, nëse duam gjithëpërfshirje dhe të sigurohemi që të gjithë mësuesit dhe të gjithë nxënësit janë në komunikim me njëri-tjetrin, duhet të lejojmë edhe rrjetet sociale, konkretisht whatsapp-in”, shprehet ministrja dhe gjen rastin të falënderojë të gjithë prindërit për mirëkuptimin që kanë patur për mësuesit, të cilët në këtë fazë kanë testuar ndoshta platforma të ndryshme me nxënësit e vet derisa kanë gjetur atë që është më e përshtatshme për të gjithë.

Ministrja Shahini adreson sërish një pyetje që vazhdon të vijë nga shumë nxënës, e cila ka të bëjë me provimet e maturës. Ajo shprehet:

“Unë besoj se tashmë jemi qartësuar të gjithë se provimet do të mbahen. E vetmja arsye që do të bënte të mos mbaheshin provimet është nëse qëndrojmë të izoluar deri në qershor apo korrik. Kjo nuk e besoj se do të ndodhë, por edhe nëse ndodh, atëherë do të marrim një vendim tjetër. Deri atëherë, duhet të llogarisim se provimet kombëtare do të bëhen. Ne thjesht do të sigurohemi që temat të cilat nuk jemi të sigurtë se janë zhvilluar aq sa duhet në kushte shtëpie të mos jenë të vendosura në formë pyetjesh në testin kombëtar”, sqaron ministrja Shahini dhe shton se:

“Kështu që maturantët besoj se po e kalojnë këtë kohë duke mësuar, duke thelluar njohuritë e tyre në temat që do të pyeten për provimet kombëtare, duke ushtruar pyetjet e ndryshme që janë në dispozicion tek website-i i Qendrës që Shërbimeve Arsimore – pyetje nga provimet e mëparshme të maturës, të cilat japin një orientim se çfarë lloj pyetjesh mund të kenë në provimin e maturës”.

Previous ArticleNext Article

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *