Problemet me akt ekspertizat e pallateve të dëmtuara nga tërmeti i 26 nëntorit vazhdojnë të jenë prezente. Pjerin Fran Gjoni nga Lezha dhe disa banorë të tjerë, ankohen, se edhe pse pallati i tyre nuk ka dëmtime, përsëri është vendosur të shembet.Një ditë të bukur iu është thënë nga Bashkia, se pallati do të shembet në muajin qershor me urdhër nga lart. Në pallat në fakt nuk duket asnjë shenjë dëmtimi dhe banorët as janë zhvendosur prej aty, e as janë trajtuar me bonus qiraje.Për problemin e tyre jemi drejtuar në bashkinë e Lezhës dhe nënkryetari, Ermal Pacaj, thotë, se ka shkuar ekspertiza e thelluar nga Instituti I Ndërtimit dhe vlera e rikonstruksionit e kalon vlerën e ndërtimit nga e para. Sipas tij pallati do të shembet, pasi ka dalë i dëmtuar në strukturë. Pacaj thotë, se banorët janë evakuar, por në fakt ata nuk kanë lëvizur asnjë ditë nga shtëpitë e tyre.
