Kryetari i SPAK Arben Kraja ka deklaruar se e vlerëson si të papërshtatshme përfshirjen e SPAK për të kryer vettingun e politikanëve.

Këtë deklaratë, Kraja e bëri në mbledhjen e Këshillit të Legjislacionit që diskutoi amendamentet kushtetuese të depozituara nga Partia Demokratike.

Për kreun e SPAK, vettingu i politikanëve do të ishte një ngarkesë e jashtëzakonshme pune.

 “Në raport me materialin që është përgatitur për përfshirjen  e SPAK. Është një procedurë administrative e parashikuar në kushtetutë për tu realizuar që përfshin rreth 200 subjekte. Një procedurë që do kohën e saj dhe me këto kritere duhet vlerësuar. Formalisht është një mundësi për t’i ngarkuar prokurorisë detyra të tjera, por këto nuk duhet të pengojnë thelbin e punës së prokurorisë që është ndjekja penale. Është një ngarkesë e jashtëzakonshme pune. Ne kemi kaluar një eksperiencë negative me OFL-të. Ishte një detyrë e ngarkuar me ligj që na shfokusoi nga objekti i punës tonë. Prandaj do ta vlerësoja të papërshtatshme përfshirjen e SPAK në këtë proces. Jam kundër përfshirjes së Prokurorisë së Posaçme në këtë proces administrativ,” deklaroi Kraja.