Presidenti i SHBA-së, Donald Trump, mori pyetjet e gazetarëve nga një vend i pazakontë të martën, pikërisht nga çatia e Shtëpisë së Bardhë.
Trump u shfaq papritur në çati dhe bëri shaka me gazetarët, të cilët e pyetën se çfarë po bënte atje.
Ai u përgjigj me humor: “Raketa bërthamore”, duke imituar lëshimin e një arme me krahun e tij.
Presidenti ishte i shoqëruar nga truprojat e tij dhe të tjerë, përfshirë edhe James McCrery, arkitektin e projektit të sallës së vallëzimit të Shtëpisë së Bardhë me vlerë 200 milionë dollarë.
Duke iu referuar këtij projekti, Trump tha: “Është thjesht një mënyrë tjetër për të shpenzuar paratë e mia për vendin”.
Shëtitja zgjati rreth 20 minuta. Është e mundur që Trump të ketë në mendje ndryshime të tjera arkitekturore për Shtëpinë e Bardhë.
Videot e Presidentit Trump në çatinë e Shtëpisë së Bardhë u bënë virale në rrjetet sociale.
