Jemi interesuar nëpër fallxhore, apo persona, që shohin filxhanë në Tiranë, për t’u interesuar për kandidatët e listës së hapur për zgjedhjet parlamentare të 11 majit. Të parës, një zonje në lagjen “Don Bosko”, i kemi kërkuar, që votat e Sali Berishës, t’ia kalojë Jorida Tabakut. Fallxhorja tjetër, në rrugën “Ali Demi”, me manovrat e saj, arrin ta nxjerrë Kreshnik Collakun e listës së demokratëve, deputet të sigurtë.
Kryeministri Rama mbylli dje fushatën elektorale në Fier, duke parë filxhan dhe duke iu gëzuar rezultatit të mbetjes së kafesë. Në studion e “Stop” edhe ne kemi parë filxhanin dhe parashikimin tonë, që duket edhe më serioz se sondazhet e publikuara deri më sot.
Për parashikimin e votave të 11 majit, jemi ndaluar edhe te një grua në Bulevardin e ri. Asaj i kemi thënë, që po punojmë për Partinë e Lirisë dhe këshillat për ca kokrra sheqer të kënduara, do të bëjnë mrekulli.Ndërsa në zonën e Shkozës i kemi thënë një zonje, që po punojmë për Erion Bracen dhe zonja na e “ngrohu zemrën”, duke na e nxjerrë Bracen deputet.
