Flamuri i Kosovës u vendos të mërkurën në Beograd, në hyrje të sallës ku po mbahet Kongresi i 49-të i UEFA-s.

Ndërsa një ditë më pas, këtë të enjte, Federata e Futbollit e Serbisë e ka hequr flamurin e Kosovës dhe u ka kërkuar falje të gjithë serbëve duke e cilësuar lejimin e vendosjes së flamurit si neglizhencë.

“Reaguam së bashku, shpejt dhe me vendosmëri, dhe me përgjegjësi të plotë informojmë publikun se nuk ka asnjë flamur apo simbol të Kosovës në Kongresin e UEFA-s sot në Beograd”, thuhet ndër të tjera në njoftim.

Por jo vetëm kaq, edhe në sallën ku po mbahet ky Kongres, të gjitha vendet anëtare përfaqësohen me flamujt e tyre, përveç Kosovës, e cila shihet vetëm me logon e Federatës së Futbollit të Kosovës.

Federata Serbe ka reaguar nëpërmjet një komunikate, ku ka kërkuar falje për gjithë serbët:

“Kongresi i 49-të i UEFA-s po zhvillohet sot në Beograd, një nga ngjarjet më të mëdha që është mbajtur ndonjëherë në vendin tonë. Kongresi organizohet nga UEFA, ndërsa Federata e Futbollit e Serbisë mirëpret figurat më të rëndësishme të futbollit në Evropë dhe botë. Organizimi i jashtëzakonshëm u zbeh nga një neglizhencë e organizatorëve, të cilën një pjesëmarrës në Kongres u përpoq ta shfrytëzonte për interesa jo-futbollistike. Reaguam së bashku, shpejt dhe me vendosmëri, dhe me përgjegjësi të plotë informojmë publikun se nuk ka asnjë flamur apo simbol të Kosovës në Kongresin e UEFA-s sot në Beograd. Kërkojmë ndjesë për çdo qytetar tonin dhe çdo anëtar të popullit tonë, veçanërisht për bashkëkombësit tanë në Kosovë, të cilët u ndjenë të shqetësuar dhe të lënduar nga kjo mungesë vëmendjeje e organizatorit, e cila u korrigjua menjëherë pas reagimit tonë”, thuhet në komunikatën e Federatës Serbe të Futbollit.

Kujtojmë që një ditë më parë Presidenti i FFK-s, Agim Ademi ka pozuar me flamurin e Kosovës në Kongresin e UEFA-s në Beograd.