Po gërmonin një tunel me shumë gjasë për të kryer një grabitje në një bankë aty pranë, por për shkak të shembjes së një pjese të asfaltit, një anëtar i një bande të dyshuar hajdutësh ngeci brenda tij.

Ngjarja ka ndodhur në Romë ku po punohet për nxjerrjen e personit në fjalë që fillimisht është ngatërruar me një punëtor, ndërsa po hapet paralelisht një tunel nga zjarrfikësit. Të paktën tre persona të tjerë, gjithashtu të dyshuar si pjesë e bandës, janë dëgjuar nga karabinierët.

Disa prej tyre, nga sa mësohet, janë me precedentë penalë. Prej disa orësh zjarrfikësit po punojnë për të shpëtuar personin që ra në humnerë, ende i paarritur, por që u furnizua me oksigjen dhe iu dha ushqim i lëngshëm nga personeli 118. Aksidenti ndodhi rreth mesditës në via Innocenzo. XI, në numrin 42, në rrethin Aurelio.