Menjëherë pas vendimit të qeverisë për mbylljen e platformës TikTok për një periudhë 12-mujore, ka reaguar kreu i PD-së Sali Berisha.
Ai ka paralajmëruar protestë kombëtare kundër mbylljes së TikTok më 15 mars.
Në një deklaratë për mediet, Berisha e cilësoi vendimin akt censure dhe tha se ky vendim e rreshton Shqipërinë krah Afganistanit dhe Iranit. Ai ftoi të rinjtë t’i bashkohen në protestë më 15 mars para kryeministrisë.
Vendimi për mbylljen e TikTok për një periudhë 12-mujore u njoftua ditën e sotme nga ministrja e Arsimit, Ogerta Manastirliu pas përfundimit të mbledhjes së qeverisë.
Manastriliu tha se gjatë kësaj periudhe, qeveria do të marrë masat e duhuar për të siguruar një lundrim të sigurt në paltformën TikTok që nuk cenon sigurinë e fëmijëve.
Berisha: Sot në kulmin e fushatës elektorale, narkopadrinoja i Shqipërisë, Toto Rino apo El Çapo, njoftoi vendimin e narkoqeverisë së tij për ndalimin e TikTokut për 12 muaj. Me këtë akt censure të mbi 1 milion përdoruesve të TikTokut në Shqipëri, Edi Rama rreshton Shqipërinë me Afganistanin dhe Iranin.
Ky akt censure është një akt i mirëfilltë fanatizmi, intolerance, frike dhe tmerri nga mendimi i lirë dhe shprehja e tij. TikTok është një platformë komunikimi, e cila ka pushtuar sot, ka pëlqimin masivisht të të rinjve në Shqipëri dhe në botë.
Të pretendosh se po ecën drejt Europës dhe të rreshtosh Shqipërinë me Iranin, Afganistanin, Somalinë, bën një akt monstruoz kundër fjalës së lirë, një censurë dhe dëshmon se udhëtimi evropian i Shqipërisë është një hipokrizi për ty.
Rikujtoj këtu se zëvendëspresidenti i SHBA, JD Vance, në fjalën e tij në Mynih, konsideroi mbylljen e medieve sociale si një antivlerë shumë të rrezikshme për shoqëritë e lira, fjalën e lirë dhe mendimin e lirë. T’u heqësh shqiptarëve të drejtën e përdorimit të TikTokut dëshmon se çfarë arbitrariteti.
Ripërsërit ekzakt atë që bënte Enver Hoxha, Spiro Koleka, Kristaq Rama gjatë diktaturës, të cilët valëve të radios dhe televizioneve perëndimore u vinin zhurmues në të katër anët e vendit. Me këtë rast ftoj të gjithë gjimnazistët, të gjithë të rinjtë, të gjithë qytetarët të nisim betejën për çlirimin e TikTokut dhe përmbysjen e narkodiktatorit.
Me datën 15 mars protestë e përgjithshme kombëtare në sheshin ‘Skënderbej’ para kryeministrisë. Një protestë në të cilën kërkohet anulimi i menjëhershëm i vendimit për censurën dhe bllokimin e TikTokut.
