Drejtori i ri i Përgjithshëm i Policisë së Shtetit, Ilir Proda, ka marrë zyrtarisht detyrën këtë të enjte.

Proda kreu betimin në një ceremoni solemne, ku ishin të pranishëm krerët e lartë të strukturave drejtuese të policisë dhe Ministri i Brendshëm, Ervin Hoxha.

“Kam besim të plotë se, në përfundim të këtij procesi reformues për strukturat drejtuese të policisë, do të krijohen kushtet e nevojshme për të arritur synimin e madh: ndërtimin e një policie moderne, e cila do të jetë e krahasueshme me strukturat e vendeve të Bashkimit Evropian”, tha Hoxha.

Proda u emërua Drejtor i Përgjithshëm i Policisë së Shtetit me vendim të Këshillit të Ministrave më datë 2 tetor.

Ai ka një karrierë 19-vjeçare në strukturat e Policisë, duke përfshirë rolin e tij si shef i disa drejtorive të ndryshme brenda këtij institucioni.

Proda iu poropzua kryeministrit Rama nga ministri i Brendshëm Ervin Hoxha, pas një konkursi të zhvilluar gjatë muajit shtator.