Policia Rrugore e Tiranës ka intensifikuar aksionet kundër parkimeve të gabuara që pengojnë qarkullimin e lirë në rrugët e kryeqytetit. Gjatë kontrolleve të fundit, efektivët kanë proceduar penalisht dy drejtues automjetesh, të cilët kishin lënë mjetet e tyre të parkuara “dysh” duke bllokuar lëvizjen e lirë të mjeteve të tjera.

Sipas njoftimit zyrtar, shtetasit F. B., 20 vjeç, dhe D. D., 35 vjeç, janë proceduar penalisht pasi automjetet e tyre, të parkuara në kundërshtim me rregullat, kishin krijuar pengesa për trafikun. Dy mjetet u larguan nga rruga me ndihmën e mjetit ngritës të Policisë.

Ndërkohë, gjatë javës janë bllokuar 45 automjete dhe janë arrestuar ose proceduar 25 drejtues mjetesh, të cilët u konstatuan në timon në gjendje të dehur ose pa leje drejtimi.

Policia Rrugore bën apel për respektimin e rregullave të qarkullimit, me qëllim që të shmangen situatat që rrezikojnë sigurinë rrugore dhe pengojnë rrjedhshmërinë e trafikut.

“Kontrolli i akseve rrugore dhe penalizimi i shkelësve do të vijojnë çdo ditë në të gjithë Tiranën, me fokus të veçantë tek parkimet e gabuara”-thuhet në njoftimin e policisë.