Listës së gjatë të personave që duhen mbajtur nën patronazh nuk i ka shpëtuar as ish trajneri i Kombëtares, Xhani De Biazi. Tekniku italian e ka pak të vështirë për të kuptuar se për çfarë bëhet fjalë por në gjatë intervistës së tij për “Panorama Sport”, De Biazi zbulon se bëhet fjalë për një spiun sipas tij, ky fakt e ka hutuar jo pak:
Mister, a keni dëgjuar ndonjëherë për “patronazhistin”?
Ç’dreqin është ky?
Është një vullnetar që aderon në një parti dhe siguron të dhëna për qytetarë të ndryshëm, të cilët ai i ka në “patronazh” dhe informon se për kë votojnë, çfarë bindjesh kanë etj…
Prej disa ditësh në Shqipëri është bërë publike lista e Partisë Socialiste për qindra mijëra qytetarë dhe aty figuron edhe emri juaj.
Po, sepse edhe ju keni një patronazhist…
Prit pak prit, se këtë termin që përdorni me sa kuptoj e keni fjalën për dikë që raporton për mua apo për të tjerë se çfarë bëjmë, kë votojmë, etj…
Pak a shumë…
Ah, po dakord pra, por thuaj “spiun”. Këta janë spiunë… Pra edhe unë e paskam një spiun?! Uh, e çuditshme.
Patronazhisti juaj quhet Alban Hoxha…
Hëm… as ia kam idenë. Paska edhe të njëjtin emër me portierin, por nuk kam asnjë lidhje. As kemi pasur ndonjëherë biseda së bashku për politikë, as nuk e kam idenë nëse bëhet fjalë për të njëjtin person. Ju lutem, unë nuk jam përfshirë ndonjëherë me politikën. Më del dhe më tepron sporti. Dua të qëndroj jashtë kësaj. Sigurisht, sapo mësova një gjë të çuditshme, por nuk dua të përzihem fare. Gjeni këtë tipin që më spiunonte mua edhe pyeteni, nuk dua fare të merrem me këtë.
