Kryetari i bashkisë së Shkodrës, Benet Beci ka reaguar me anë të një postimi në rrjetin social facebook mbi ngjarjen e rëndë të ndodhur në këtë qytet me plagosjen e dy personave dhe vrasjen e dy të tjerëve.

Beci shprehet se kjo ngjarje kriminale duhet të ndëshkohet maksimalisht, duke shtuar se ka kontaktuar edhe me strukurat kundër krimit me qëllimin garantimin e sigurisë së qytetarëve.

Ky mëngjes për Shkodrën nuk ishte ai i zakonshmi, siç ndodh çdo ditë në qytetin tonë. Një ngjarje kriminale që duhet të marrë ndëshkimin e ashpër të ligjit ka tronditur zemrën e qytetit.

Kam kontaktuar me Ministrin e Brendshëm dhe me të gjitha strukturat që luftojnë krimin, në emër të jetës dhe sigurisë së qytetarëve të Shkodrës, të cilët nuk meritojnë të përballen me skena të tilla”, shkruan Benet Beci.

Atentati ndodhi në një lokal në zemër të qytetit, pranë bashkisë së Shkodrës. Sipas burimeve paraprake, autor i dyshuar i atentatit është Ragip Gilaj, i cili dyshohet se ka qëlluar me armë automatike ndaj personave që ndodheshin në lokal.

Në sulm mbeti i vrarë Armando Pali, ish-punonjës i IMT-së, si dhe Geridon Kraja që raportohet të ketë qenë truproja i Erogen Vasos, ky i fundit edhe shënjestër e atentatit.