Kryeministri izraelit Benjamin Netanyahu ka deklaruar se Izraeli nuk do të lejojë krijimin e një shteti palestinez, duke e cilësuar atë si një “shtet terrorist”.

Në një deklaratë publike, Netanyahu u shpreh:

“Kam një mesazh të qartë për ata liderë që njohin një shtet palestinez pas masakrës së 7 tetorit: ju po i jepni një dhuratë të madhe terrorizmit. Kjo nuk do të ndodhë. Nuk do të ketë shtet palestinez në perëndim të Jordanit.”

Ai theksoi se prej vitesh ka kundërshtuar krijimin e një shteti të tillë, pavarësisht “presioneve të mëdha, si të brendshme, ashtu edhe ndërkombëtare”. Netanyahu nënvizoi gjithashtu se gjatë qeverisjes së tij është dyfishuar numri i vendbanimeve hebraike në Judea dhe Samaria, duke shtuar se kjo politikë do të vazhdojë.

Kryeministri izraelit bëri me dije se përgjigja ndaj përpjekjeve të fundit për të imponuar një shtet palestinez do të jepet pas kthimit të tij nga vizita në Shtetet e Bashkuara.

Kujtojmë se më 21 shtator 2025, katër shtete të rëndësishme perëndimore, si Mbretëria e Bashkuar, Kanadaja, Australia dhe Portugalia, njohën zyrtarisht shtetin palestinez, duke shënuar një ndryshim të rëndësishëm në politikën e jashtme të këtyre vendeve.