Izraeli mund të ndërmarrë një sulm ushtarak ndaj Iranit brenda disa ditësh, kanë pohuar burime të afërta me çështjen për mediat amerikane, ndërsa tensionet në Lindjen e Mesme vijojnë të rriten. NBC News raportoi se zyrtarë të informuar mbi zhvillimet kanë bërë të ditur se operacioni mund të realizohet edhe pa mbështetjen e Shteteve të Bashkuara.
Zyrtarët amerikanë, sipas këtij raportimi, janë vendosur në gatishmëri të shtuar, ndërkohë që bisedimet midis SHBA-së dhe Iranit pritet të rifillojnë në Oman më 15 qershor. Ndërkohë, Uashingtoni ka dhënë udhëzime që personeli diplomatik jo thelbësor të largohet nga disa zona të Lindjes së Mesme.
Në anën tjetër, burime iraniane kanë bërë të ditur se qeveria në Teheran, në bashkëpunim me udhëheqësit ushtarakë, ka filluar hartimin e një plani përgjigjeje në rast të një sulmi izraelit. Pjesë e këtij skenari përfshihen përdorimi i qindra raketave balistike ndaj objektivave izraelite.
Ndërkohë, Marina e SHBA-së konfirmoi se nuk ka në plan të ndryshojë pozicionin e aeroplanmbajtëses “USS Carl Vinson”, e cila ndodhet në Detin Arabik prej disa javësh, duke ruajtur qëndrimin e saj strategjik në rajon.
Situata mbetet delikate, ndërsa komuniteti ndërkombëtar ndjek me shqetësim zhvillimet e mundshme që mund të çojnë në një përshkallëzim të ri ushtarak në Lindjen e Mesme.
