Një 30-vjeçar, i cili dyshohet se shantazhonte dhe përndiqte një shtetase dhe familjarët e saj është arrestuar këtë të premte nga policia e Tiranës.

Mësohet se i riu përndiqte vajzën në fjalë me qëllim zhvatjen e një shumë prej 5 mijë euro duke e kërcënuar atë dhe familjarët e saj se do t’i publikonte fotot dhe videot personale në rrjete sociale.

Sipas policisë, 30-vjeçari rezulton një person me precedentë të mëparshëm penal, pasi ka qenë 7 herë i shpallur në kërkim për vepra të ndryshme penale dhe i dënuar për vepra penale në fushën e narkotikëve në shtetin zvicerian.

Materialet në ngarkim të tij i kaluan Prokurorisë, për veprime të mëtejshme.

“Shërbimet e Sektorit për Hetimin e Krimeve Kibernetike, në bashkëpunim me Seksionin e Operacioneve Speciale në DVP Tiranë, Sektorin e Forcës së Posaçme “Shqiponja” dhe DVP Dibër, në vijim të punës për goditjen e krimeve kibernetike, kanë organizuar dhe finalizuar operacionin policor të koduar “Phone fiend”.

Gjatë operacionit u ndalua shtetasi I. V., 30 vjeç, banues në Bulqizë, për veprat penale “Përndjekja” dhe “Shtrëngimi me anë të kanosjes ose dhunës për dhënien e pasurisë”, parashikuar nga nenet 121/a/2 dhe 109/b.

Falë veprimeve hetimore profesionale nga specialistët e Sektorit të Hetimit të Krimeve Kibernetike, të kryera gjatë zhvillimit të këtij operacioni, është bërë dokumentimi i plotë ligjor i veprimtarisë kriminale të këtij shtetasi, i cili dyshohet se ka përndjekur fizikisht dhe në rrjete sociale, një 33-vjeçare dhe familjarët e saj, për mospublikimin e disa fotove dhe videove personale të 33-vjeçares, në rrjete sociale”, thuhet mes të tjerash në njoftimin e policisë.