Një ngjarje e pazakontë është zbuluar në Kavajë, ku një 28-vjeçar ka mashtruar babain e tij, duke i bërë të besonte se ishte rrëmbyer dhe se për lirimin e tij kërkohej një shumë parash. Pas hetimeve të shpejta, Policia ka arrestuar dy persona, autorin kryesor të mashtrimit dhe bashkëpunëtorin e tij.

Lubjan Camema 28 vjeç, banues në Kavajë, ishte ai që kishte inskenuar rrëmbimin e tij për të mashtruar babain, shtetasin B. C. Ai i kishte thënë të atit se ishte rrëmbyer dhe se kërkoheshin para për lirimin e tij. Me këtë qëllim, ai kishte përfshirë edhe Bernard Kiptiun 45 vjeç, banues në Durrës, i cili është kapur në flagrancë duke i kërkuar paratë babait të Lubjan Camemajt në lagjen nr. 16 të Durrësit, duke i thënë se ato do të shërbenin për lirimin e djalit të tij.

Pas veprimeve hetimore dhe veprimtarisë së shpejtë të Policisë, 28-vjeçari u arrestua rreth 100 metra larg vendit të ngjarjes, në një zonë të qytetit të Durrësit, pasi rezultoi se kishte inskenuar ngjarjen dhe kishte marrë automjetin e babait të tij dy ditë më parë, për ta shitur.

Të dy shtetasit, Lubjan Camema dhe Bernard Kiptiu janë arrestuar në flagrancë dhe janë vënë para përgjegjësisë për veprat e kryera. Policia po vazhdon hetimet për zbardhjen e plotë të rrethanave dhe për të siguruar prova të tjera.